حسن بن علی بن محمد بن علی الرضا بن موسی بن جعفر صادق ہاشمی عسکری

واضح رہے کہ ائمہ جرح و تعدیل کے نزدیک حافظ بَلَاذُرِی سے متن تک کے راوی ثقہ ہیں، البتہ سند میں مذکور راوی حسن بن علی کو حافظ ابن جوزی l نے ’’ الموضوعات‘‘[75] میں ایک من گھڑت حدیث کے تحت ’’لیس بشیء‘‘ کہا ہے۔

تاہم  حافظ ذہبیl نے ’’موضوعات‘‘  کی اس من گھڑت حدیث میں حسن بن علی کے علاوہ دیگر راویوں کو علت قرار دیا ہے[76]، اور بذات خود حسن بن علی کو ایک دوسرے مقام پر ’’من سادة قومه، لم يبلغ رتبة آبائه في العلم والفقه‘‘. (اپنی قوم کا سردارہے، البتہ علم و فقہ میں اپنے آباء کے مرتبہ تک نہیں پہنچ سکے) قرار دیا ہے[77] ۔

نیزحافظ ابن حجر عسقلانی l ’’موافقة الخبر الخبر‘‘[78] میں ایک حدیث کے تحت سند پر بحث کرتے ہوئے فرماتے ہیں: ’’وأما الحسن بن علي وآباؤه: فهم فضلاء ثقات، وهم الأئمة عند الإمامية الإثني عشرية، يضيفون إليهم محمد بن الحسن هذا الذي يدعون أنه المنتظر، والحسن بن علي بن أبي طالب‘‘. اور بہرحال حسن بن علی اور اس کے آباء: تو وہ فضلاء ثقات ہیں، اور وہ اثنا عشریہ امامیہ فرقہ کے نزدیک ائمہ ہیں، وہ ان کے ساتھ اس محمد بن حسن کو بھی شامل کرتے ہیں جن کے بارے میں دعوی کرتے ہیں کہ وہ مُنْتَظَر ہے، اور حسن بن علی بن ابی طالب کو بھی۔

حافظ ابن حجر عسقلانیl ہی ’’لسان المیزان‘‘[79] میں حسن بن علی بن محمد کے ترجمہ میں فرماتے ہیں: ’’ أحد من يعتقد الإمامية إمامته، ضعفه ابن الجوزي في الموضوعات‘‘. یہ ان میں سے ایک ہے جن کے بارے میں فرقہ امامیہ امامت کا عقیدہ رکھتا ہے، اسے ابن جوزی l نے موضوعات میں ضعیف قرار دیا ہے۔

یہ بھی واضح رہے کہ علی بن موسی الرضا کے بارے میں ائمہ کے اقوال ایک دوسری روایت کے تحت پہلے گزر چکے ہیں[80]۔