ابو اسحاق ابراہیم بن زکریا عجلی ضریر معلم

حافظ ابو بکر بزار l نے اپنی ’’مسند‘‘[52] میں ایک روایت کے تحت ابراہیم بن زکریا ضریر معلم کو  ’’منكر الحديث‘‘کہا ہے۔

حافظ ابو حاتمl فرماتے ہیں: ’’مجهول، والحديث الذي رواه منكر‘‘[53]. مجہول ہے، اور اس کی روایت کردہ حدیث منکر ہے۔

حافظ عقیلیl ’’الضعفاء الكبير‘‘[54] میں ابراہیم بن زکریا ضریر بصری کا ترجمہ قائم کرکے فرماتے ہیں: ’’صاحب مناكير وأغاليط‘‘. یہ صاحبِ مناکیر واغالیط ہے۔

حافظ ابن حبانl ’’الثقات‘‘[55] میں فرماتے ہیں: ’’إبراهيم بن زكريا العجلي أبو إسحاق من أهل البصرة، يروي عن شعبة، وهمام بن يحيى، روى عنه يعقوب بن سفيان‘‘. ابو اسحاق ابراہیم بن زکریا عجلی بصرہ کا رہنے والا ہے، شعبہ اور ہمام بن یحیی سے روایت کرتا ہے، اس سے یعقوب بن سفیان نے روایت کی ہے۔

نیز حافظ ابن حبان l نے ’’المجروحين‘‘[56] میں ابراہیم بن زکریا واسطی کا ترجمہ ان الفاظ سے قائم کیا ہے: ’’إبراهيم بن زكريا الواسطي، شيخ، يروي عن مالك، وأبي بكر بن أبي عياش، وروى عنه إبراهيم بن راشد الآدمي، ومحمد بن عبيد الله القرشي، يأتي عن الثقات مالا يشبه حديث الأثبات، إن لم يكن بالمتعمد لها فهو المدلس عن الكذابين، لأني رأيته قد روى أشياء عن مالك موضوعة، ثم رواها أيضا عن موسى بن محمد بن البلقاوي، عن مالك، وهو من أهل واسط من قرية من قراها يقال لها: عيدسي [ كذا في الأصل، والصحيح: العبدسي]‘‘.

ابراہیم بن زکریا واسطی شیخ ہے، مالک اور ابو بکر بن ابی عیاش سے روایت کرتا ہے، اور اس سے ابراہیم بن راشد آدمی اور محمد بن عبد اللہ قرشی روایت کرتے ہیں، یہ ثقہ راویوں کے انتساب سے ایسی روایات لاتا ہے جو ثبت راویوں کی حدیث کے مشابہ نہیں ہوتیں، اگر وہ یہ روایات جان بوجھ کر نہیں لاتا تو یہ جھوٹے راویوں سے تدلیس کرتا ہے، کیونکہ میں نے اسے دیکھا کہ اس نے مالک کے انتساب سے من گھڑت اشیاء روایت کیں، پھر انہی من گھڑت اشیاء کو موسی بن محمد بن بلقاوی، عن مالک کے انتساب سے روایت کیا، اور وہ واسط کی بستیوں میں سے کسی بستی کا رہنے والا ہے، جسے عبدسی کہا جاتا ہے[57]۔

حافظ ابن عدی l ’’الكامل‘‘[58] میں ابراہیم بن زکریا معلم ضریر عجلی کا ترجمہ قائم کرکے فرماتے ہیں: ’’حدث عن الثقات بالبواطيل‘‘. اس نے ثقہ راویوں کے انتساب سے باطل روایات بیان کی ہیں۔

نیز حافظ ابن عدی l ’’الكامل‘‘[59] میں اسی ابراہیم بن زکریا کے ترجمہ میں چند روایات ذکر کرکے فرماتے ہیں: ’’وهذه الأحاديث مع غيرها يرويها إبراهيم بن زكريا، هذه كلها أو عامتها غير محفوظة، وتبين الضعف على رواية حديثه، وهو في جملة الضعفاء‘‘. اور یہ احادیث دوسری احادیث کے ساتھ جن کو ابراہیم بن زکریا روایت کرتا ہے، یہ تمام کی تمام یا ان میں سے اکثر غیر محفوظ ہیں، اور اس کی حدیث کی روایت پر ضعف واضح ہے، اور یہ من جملہ ضعفاء میں سے ہے۔

حافظ ابن قیسرانی l ’’ذخيرة الحفاظ‘‘[60] میں ایک دوسری روایت کے تحت ابراہیم بن زکریا کے بارے میں فرماتے ہیں: ’’وهذا منكر، لايرويه غير إبراهيم، والحمل عليه فيه‘‘. اور یہ منکر ہے، ابراہیم کے علاوہ کسی نے اسے روایت نہیں کیا، اور اس میں اسی پر حمل ہے۔

حافظ ابن جوزی l ’’الموضوعات‘‘[61] میں ابراہیم بن زکریا ضریر کی سند سے منقول ایک روایت کو من گھڑت قرار دے کر  فرماتے ہیں: ’’والمتهم به إبراهيم بن زكريا‘‘. اور اس میں متہم ابراہیم بن زکریا ہے۔

حافظ ذہبی l نے ’’ديوان الضعفاء‘‘[62] میں ابراہیم بن زکریا ضریر عجلی معلم کو ’’متهم‘‘ کہا ہے[63]۔

حافظ ہیثمی l  نے ’’مجمع الزوائد‘‘[64] میں ایک حدیث کے تحت ابراہیم بن زکریا معلم کو ’’ضعيف جدا‘‘ کہا ہے۔

حافظ بدر الدین عینی l نے ’’نخب الأفكار‘‘[65] میں ایک روایت کے تحت ابراہیم بن زکریا ضریر بصری کو ’’ضعيف جدا‘‘ قرار دیا ہے۔