روایت: آپ ﷺ کا ارشاد ہے: ’’اگر میں اپنے والدین یا ان میں سے کسی ایک کو اس حالت میں پاؤں کہ میں عشاء کی نماز میں مشغول ہوں اور سورۂ فاتحہ پڑھ چکا ہوں، اسی دوران میری والدہ مجھے پکار کر کہے: اے محمد! تو میں جواب میں اپنی والدہ سے کہوں گا: حاضر ہوں!‘‘۔
حکم: شدید ضعیف، بیان نہیں کرسکتے۔
تحقیق کی تفصیل
سُنَن کا ایک بڑا ذخیرہ سقیم سندوں کی شکل میں محفوظ ہے، ان سقیم روایتوں کےلئے محدثینِ کرام نے ایسے فنی اصول وضع کیے ہیں، جن کی روشنی میں ان احادیث کو اُن کا فنی مقام دیا جاتا ہے،چنانچہ جمہور علما کے نزدیک فضائل کے باب میں ضعیف حدیث پرعمل کرنا جائز ہے،البتہ حافظ ابن حجر رحمہ اللہ نے اس جوازِ عمل کےلئے تین بنیادی شرائط ذکر کی ہیں،جن کو حافظ سخاوی رحمہ اللہ نے ’’القول البدیع‘‘ میں نقل کیا ہے، موصوف فرماتے ہیں:
’’سمعتُ شیخَنا ابن حجر أي العسقلاني المصري مِرَاراً ـ وکتبه لي بخطّه ـ یقول: شَرْطُ العَمَلِ بالحدیث الضعیف ثلاثة: الأوّل: متفقٌ علیه، وهو أن یکون الضعفُ غیرَ شدید، فیَخْرُجُ مَن انْفَرَدَ مِنَ الکذّابین والمتّهمین ومَنْ فَحُشَ غلطُه، والثاني: أن یکون مُنْدَرِجاً تحت أصل عام؛ فیَخْرُجُ ما یُخْتَرَعُ بحیث لا یکون له أصلٌ أصلاً، والثالث: أن لا یُعْتَقَدَ عند العَمَلِ به ثبوتُه؛ لئلا یُنْسَب إلی النبي صلى الله عليه وسلم ما لم یقله، قال: والأخیران عن ابن عبد السلام وابن دَقِیق العید،والأوّل نقل العلائي الاتّفاقَ علیه‘‘[1].
میں نے اپنے شیخ حافظ ابن حجر رحمہ اللہ سے کئی دفعہ سنا ہے - اور حافظ ابن حجر رحمہ اللہ نے مجھے اپنی قلم سے یہ شرائط لکھ کر بھی دیں - کہ ضعیف حدیث پر عمل کرنے کےلئے تین شرائط ہیں: پہلی شرط اتفاقی ہے کہ ضُعف شدید نہ ہو، لہذا اس شرط سے وہ کذّابین اور متہمین اورفاحش الغلط رُوات نکل گئے، جو نقلِ روایت میں منفرد (تنہا) ہوں۔
دوسری شرط یہ ہے کہ روایت دین کے اصلِ عام کے تحت داخل ہو، اس شرط سے وہ روایتیں نکل گئیں جو گھڑی گئی ہوں،اس طور پر کہ ان کی کوئی اصل نہ ہو۔
تیسری شرط یہ ہے کہ حدیث پر عمل کرتے وقت ثبوتِ حدیث کا اعتقاد نہ ہو، تاکہ آپ ﷺ کی طرف کوئی ایسی بات منسوب نہ ہو جائے، جو آپ ﷺ نے نہ فرمائی ہو۔
حافظ ابن حجر رحمہ اللہ نے مزید فرمایا: آخری دو شرطیں ابن عبد السلام رحمہ اللہ اورابن دَقِیق العید رحمہ اللہ سے منقول ہے،اور شرط اول پر علامہ علائی رحمہ اللہ نے علماء کا اتفاق نقل کیا ہے۔
اس دینی انحطاط کے دور میں ان شرائط کو ملحوظ رکھنے کی ضرورت اور بھی بڑھ جاتی ہے۔ محدثینِ کرام کے اسی منہج کے پیشِ نظر ذیل میں ایک ایسی حدیث کی فنی تحقیق ذکر کی جائی گی،جس میں مذکورہ شرائط میں سے شرطِ اول مفقود ہے، جس کا مقتضی یہ تھا کہ اسے فضائل کے باب میں بھی بیان کرنے سے احتراز کیا جاتا، لیکن اس کے باوجود یہ روایت زبان زد عام ہے۔
آپ ﷺ کا ارشاد ہے: ’’اگر میں اپنے والدین یا ان میں سے کسی ایک کو اس حالت میں پاؤں کہ میں عشاء کی نماز میں مشغول ہوں اور سورۂ فاتحہ پڑھ چکا ہوں، اسی دوران میری والدہ مجھے پکار کر کہے:اے محمد! تو میں جواب میں اپنی والدہ سے کہوں گا: حاضر ہوں!‘‘۔
واضح رہے کہ اس حدیث کی تحقیق چار اجزاء پر مشتمل ہے:
۱ - حدیث کی تخریج
۲- روایت پر ائمہ حدیث کا کلام
۳- متہم راوی پر ائمہ جرح وتعدیل کے اقوال
۴- گزشتہ تفصیلات سے ماخوذ روایت کاحکم
امام بیہقی رحمہ اللہ (المتوفی۴۳۵ھ) ’’شعب الإیمان‘‘[2] میں رقمطراز ہیں:
’’أخبرنا أبو الحُسَیْن بن بِشْرَان، أخبرنا أبو جعفر الرَزَّاز، حدثنا یحیی بن جعفر، أخبرنا زید بن الحُبَاب، حدثنا یاسین بن مُعاذ، حدثنا عبد اﷲ بن قُرَیْر، عن طَلْقِ بن عَلِيّ قال: سمعتُ رسولَ الله صلى الله عليه وسلم یقول: ’’لو أدرکتُ والِدَيَّ أو أحَدَهما وأنا في صلاة العشاء وقد قرأتُ فیها بفاتحة الکتاب، تُنَادِي یا مُحَمّد! لأجبتُها لبَّیک‘‘. یاسین بن معاذ ضعیف‘‘.
ترجمہ: حضرت طلق بن علی رضی اللہ عنہ فرماتے ہیں کہ میں نے آپ ﷺ کو فرماتے ہوئے سنا : ’’اگر میں اپنے والدین یا ان میں سے کسی ایک کو اس حالت میں پاؤں کہ میں عشاء کی نماز میں مشغول ہوں اور سورۂ فاتحہ پڑھ چکا ہوں، اسی دوران میری والدہ مجھے پکار کر کہے،:اے محمد! تو میں جواب میں اپنی والدہ سے کہوں گا:میں حاضر ہوں!‘‘، (امام بیہقی رحمہ اللہ فرماتے ہیں) اس روایت میں یاسین بن معاذ ضعیف راوی ہے۔
علامہ ابن جوزی رحمہ اللہ (۵۹۷ھ) نے ’’الموضوعات‘‘[3] میں یہی روایت اس سند سے ذکر کی ہے: ’’ أبو الحَسَن عَلِيّ بن أحمد الموحد، أنبأنا هناد بن إبراهيم النسفي، حدثنا أبو الحسن عفيف بن محمد الخطيب، حدثنا أبو بكر محمد بن أحمد بن حبيب، حدثنا يحيى بن أبي طالب، حدثنا زيد بن الحُباب، حدثنا أبو بكر ياسين بن معاذ، حدثنا عبد الله بن قرين، عن طَلْق بن عَلِيّ قال سمعتُ رسولَ الله صلى الله عليه وسلم يقول: لو أدركتُ والدَيَّ أو أحدَهما ...‘‘.
واضح رہے کہ امام بیہقی رحمہ اللہ اور علامہ ابن جَوزِی رحمہ اللہ کی ذکر کردہ دونوں سندوں میں راوی ابوبکر یاسین بن معاذ الزیات متکلم فیہ ہے،جن کے بارے میں ائمہ رجال کے اقوال عنقریب تفصیل سے لکھے جائیں گے۔
یہاں اختلافِ نسخ سے متعلق دو امور قابلِ ذکر ہیں:
۱- ’’شعب الإیمان‘‘ کی سند میں یاسین بن معاذ،عبد اللہ بن قُریر سے اس روایت نقل کرنے والے ہیں، لیکن حافظ ابن جَوزِی رحمہ اللہ نے ’’کتاب الموضوعات‘‘ میں یہ لفظ عبد اللہ بن قرین لکھا ہے،واضح رہے کہ صحیح عبد اللہ بن قُریر ہے، اور عبد اللہ بن قرین تصحیف (تبدیلی) ہے،کیونکہ حافظ ابن ماکولا رحمہ اللہ نے ’’الإکمال فی رفع الارتیاب‘‘[4] میں عبد اللہ بن قُریر کے عنوان سے ترجمہ قائم کیا ہے، پھر لکھتے ہیں: ’’حدّث عن طلق بن علي الیماني،روی عنه یاسین الزیات‘‘. یعنی عبد اللہ بن قُریر، طلق بن علی رضی اللہ عنہ سے،اور یاسین الزیات،عبد اللہ بن قُریر سے روایت نقل کرنے والے ہیں، چنانچہ ثابت ہوا کہ زیرِ بحث سندمیں راوی عبد اللہ بن قُریر ہی ہے،اور عبد اللہ بن قرین تصحیف (تبدیلی) ہے؛ کیونکہ اس سند میں عبد اللہ بن قُریر، طلق بن علی رضی اللہ عنہ سے، اور یاسین الزیات،عبد اللہ بن قُریر سے روایت نقل کرنے والے ہیں۔
۲- دوسری اہم بات یہ ہے کہ ’’شعب الإیمان‘‘ کی عبارت میں لفظِ ’’تُنَادِي‘‘ (میری والدہ مجھے پکارے) ہے،چنانچہ ترجمہ بھی اسی لفظ کے مطابق (میری والدہ مجھے پکارے) کیا گیا ہے،البتہ ’’کتاب الموضوعات لابن الجوزی‘‘ میں یہ لفظ ’’یُنَادِي‘‘ (صیغۂ مذکر) لکھا ہے،اس صورت میں ترجمہ یہ ہوگا: ’’میرے والد یا والدین میں سے کوئی ایک مجھے پکارے‘‘۔
علامہ ابن جَوزِی رحمہ اللہ (المتوفی ۵۹۷ھ)، حافظ ذَہَبِی رحمہ اللہ (المتوفی ۷۴۸ھ)، حافظ شمس الدین سخاوی رحمہ اللہ (المتوفی۸۰۶ھ)، علامہ سُیوطِی رحمہ اللہ (المتوفی ۹۱۱ھ)، علامہ ابن عراق رحمہ اللہ (المتوفی۹۶۳ھ)اور امام شَوکانی رحمہ اللہ (المتوفی ۱۲۵۰ھ)، ان تمام محدثین نے اپنی تصنیفات میں اس حدیث کا حکم بیان کیا ہے، ذیل میں ہر ایک کو تفصیل سے بیان کیا جائے گا،اور آخر میں ان تمام اقوال کا خلاصہ بھی لکھا جائے گا:
امام بیہقی رحمہ اللہ تخریجِ روایت کے بعد فرماتے ہیں:
’’اس روایت میں یاسین بن معاذ ضعیف راوی ہے‘‘۔
امام بیہقی رحمہ اللہ کے کلام کو سمجھنے سے قبل محدثین کرام کے ایک عملی منہج کا جاننا ضروری ہے، ذیل میں اس منہج کو بیان کرنے کے بعد امام بیہقی رحمہ اللہ کے کلام کی وضاحت کی جائے گی۔
واضح رہے کہ محدثینِ کرام لفظ ’’ضعیف‘‘ کا اطلاق ’’ضعفِ خفیف‘‘ اور ’’ضعفِ شدید‘‘ دونوں کے لئے کرتے ہیں، اس صورت میں قرائن سے پہچانا جاتا ہے کہ یہاں ’’ضعیف‘‘ سے کیا مراد ہے،امام بیہقی رحمہ اللہ نے بھی ’’شعب الإیمان‘‘ میں صرف ایسی روایتیں لانے کا اہتمام کیا ہےجو امام بیہقی رحمہ اللہ کے نزدیک ’’جھوٹی‘‘ نہیں ہے، البتہ یہ ممکن ہے کہ روایت یا سند کے راوی ضعفِ شدید یا ضعفِ خفیف پر مشتمل ہوں، چنانچہ امام بیہقی رحمہ اللہ ’’شعب الإیمان‘‘ کے ’’مقدمة‘‘ میں لکھتے ہیں:
’’وأنا علی رسم أهل الحدیث أحِبُّ إیراد ما أحتاج إلیه من المسانید والحکایات بأسانیدها، والاقتصار على ما لا یغلب على القلب کونه کذباً‘‘.
’’اور میں محدثین کے طریقۂ کار کے مطابق اپنی ضرورت کی مسانید اور حکایات کو ان کی سندوں کے ساتھ لانا پسند کرتا ہوں،اور صرف وہی حدیث ذکر کروں گا جن کے بارے میں میرا یہ گمان ہو کہ یہ حدیث جھوٹ نہیں ہے‘‘۔
اب ظاہر ہے کہ روایت کا شدید یا خفیف ضعیف ہونا، روایت کے جھوٹا ہونے کے علاوہ دو الگ قسمیں ہیں، ان اقسام کے ’’شعب الإیمان‘‘ میں موجود ہونے کی امام بیہقی رحمہ اللہ نے نفی نہیں کی ہے، یہی وجہ ہے کہ ’’شعب الإیمان‘‘ کی اسانیدکی طرف مراجعت کرنے والے افراد بخوبی جانتے ہیں کہ ’’شعب الإیمان‘‘ کی بعض سندیں شدید ضعیف راویوں سے خالی نہیں ہیں۔
اس تفصیل کے بعد ہم زیرِ بحث روایت پر امام بیہقی رحمہ اللہ کے کلام کا جائزہ لیتے ہیں، تو معلوم ہوتا ہے کہ امام بیہقی رحمہ اللہ نے زیرِ بحث روایت کی تخریج کرنےکے بعد لکھا ہے:’’اس روایت میں یاسین بن معاذضعیف راوی ہے‘‘۔
یہاں بھی لفظِ’’ضعیف‘‘میں دونوں احتمال ہیں: یعنی ضعفِ شدید اور ضعفِ خفیف، اور آپ سابقہ کلام سے بخوبی جان چکے ہیں کہ فضائل کے باب میں ضعیف روایت کو بیان کرنا جائز ہے، لیکن اس جواز کی بنیادی شرط حافظ ابن حجر رحمہ اللہ کے بیان کے مطابق یہ ہے کہ وہ روایت ضُعفِ شدید سے خالی ہو، اب یہاں حتمی طور پر بندہ کے سامنے کوئی واضح قرائن نہیں ہیں جن سے ان دونوں احتمالوں میں کسی ایک کی تعیین کی جا سکے، البتہ آئندہ تفصیلات کی روشنی میں یہ تو امر واضح ہے کہ امام بیہقی رحمہ اللہ کے اس قول کو (صراحت نہ ہونے کی وجہ سے) محض ضعفِ خفیف پر محمول کرنا بعید اَز قیاس ہے، بلکہ اس روایت کے بارے میں دیگر ائمہ کی صریح عبارتوں کی جانب رجوع کرنا چاہیے،جو ہم عنقریب لکھیں گے۔
پھر بعد میں امام بیہقی رحمہ اللہ کا قول مل گیا، جس میں آپ نے ایک دوسرے مقام پر یاسین زیات کو صاف لفظوں میں ’’متروک‘‘ کہا ہے (انظر: السنن البکری:۹/۱۱۱،مجلس دائرة المعارف - الهند، الطبعة۱۳۵۶هـ). واللہ اعلم۔
حافظ ابن جَوزِی رحمہ اللہ (۵۹۷ھ) ’’الموضوعات‘‘[5] میں لکھتے ہیں:
’’هذا موضوعٌ علی رسول اﷲ صلى الله عليه وسلم وفیه یاسین، قال یحیی: لیس حَدِیثُه بِشَيء، وقال النسائي: مَتْرَوکُ الحَدِیث، وقال ابن حِبّان: یَروْي الموضوعات عن الثِّقَات، ویَتَفَرَّدُ بالمُعْضَلات عن الأثبات، لا یجوز الإحْتِجَاجُ به‘‘.
یہ حدیث رسول اﷲ ﷺ پر گھڑی گئی ہے،اور اس روایت کی سند میں یاسین ہے، جن کے بارے میں یحیی رحمہ اللہ نے ’’لیس حدیثه بشيء‘‘ (جرح) اور نسائی رحمہ اللہ نے ’’متروک الحدیث‘‘ (شدید جرح) کہا ہے،اور ابن حِبّان رحمہ اللہ فرماتے ہیں: یاسین ثقہ راویوں کی طرف منسوب کرکے روایتیں گھڑتا تھا،اور وہ ’’أثبات‘‘ (معتبر اور ثقہ راویوں) سے ’’مُعْضَلات‘‘ نقل کرنے میں متفرد (تنہا) ہوتا ہے، (چنانچہ) یاسین سے احتجاج جائز نہیں ہے۔
حافظ ذَہَبِی رحمہ اللہ (المتوفی۷۴۸ھ) ’’تلخیص کتاب الموضوعات‘‘[6] میں لکھتے ہیں: ’’فیه یاسین بن معاذ - متروک- ثنا عبد اﷲ بن قرین، عن طلق بن عليّ، ولکن في سنده هَنَّاد النسفي هَالِکٌ‘‘. اس حدیث کی سند میں یاسین بن معاذ- متروک- (شدیدکلمۂ جرح) ہے،یاسین نے عبد اﷲ بن قرین،اور عبد اﷲ نے طلق بن علی سے یہ روایت نقل کی ہے،لیکن اس حدیث کی سند میں ہنّاد نسفی ’’هالک‘‘ (شدیدکلمۂ جرح)بھی ہے۔
ہناد النسفی کے بارے میں کلام آگے آئے گا۔
علامہ شَوکانی رحمہ اللہ (المتوفی ۱۲۵۰ھ) ’’الفوائد المجموعة‘‘[7] میں لکھتے ہیں: ’’هو موضوع، آفته یاسین بن معاذ‘‘. یہ حدیث من گھڑت ہے، اس میں یاسین بن معاذ آفت(شدیدکلمۂ جرح) ہے۔
حافظ شمس الدین سخاوی رحمہ اللہ (المتوفی۹۰۲ھ) نے ’’المقاصد الحسنة‘‘[8] میں زیربحث روایت کو حدیث جریج کےلئے بطور شاہد ذکر کیا ہے، حدیث جریج یہ ہے: ’’لو کان جریجٌ فقیهاً عالماً لَعَلِمَ أنّ إجابتَه دُعَاءَ أمِّه أولی مِن عبادةِ ربِّه عزّوجلّ‘‘. ’’اگر جریج فقیہ عالم ہوتا،تو وہ جان لیتا کہ ماں کی پکار کا جواب دینا، رب کی عبادت سے اولی ہے‘‘۔
حافظ عجلونی رحمہ اللہ نے ’’کشف الخفاء‘‘ (رقم:۲۱۱۰) میں حافظ سخاوی رحمہ اللہ کے اس شاہد کو نقل کر کے لکھا ہے: ’’والحدیث ضعیف‘‘.
حافظ حسن بن سفیان رحمہ اللہ نے اپنی ’’مسند‘‘ میں ’’حدیثِ جریج‘‘ کی تخریج کی ہے، اور حافظ ابن حجر رحمہ اللہ نے ’’فتح الباري‘‘[9] میں جریج کی مذکورہ روایت میں ’’یزید بن حَوشَب الفِهْرِي‘‘ کو مجہول قرار دیا ہے،ملاحظہ ہو:
’’وقد روی الحَسَنَ بن سفیان وغیرُه مِنْ طریق اللیث عن یزید بن حَوْشَب، عن أبیه قال سمعتُ رسولَ اﷲ صلى الله عليه وسلم یقول: ’’لو کان جریجٌ عالماً لَعَلِمَ أنّ إجابتَه أمَّه أولی مِن عبادةِ ربِّه‘‘. ویزید هذا مجهول‘‘.
آپ ﷺ کا ارشاد ہے: ’’اگر جریج عالم ہوتا،تو وہ جان لیتا کہ ماں کی پکار کا جواب دینا رب کی عبادت سے اولی ہے‘‘۔
(حافظ ابن حجر رحمہ اللہ فرماتے ہیں) اس حدیث کی سند میں یزید مجہول راوی ہے۔
علامہ سُیوطِی رحمہ اللہ (المتوفی ۹۱۱ھ) نے ’’اللآلىء المصنوعة‘‘[10] میں علامہ ابن جَوزِی رحمہ اللہ کا تعاقب کرتے ہوئے لکھا ہے: ’’(قلتُ): أخرجه البیهقي في الشُعَب واﷲ أعلم‘‘. میں (امام سُیوطِی رحمہ اللہ )کہتا ہوں کہ بیہقی رحمہ اللہ نے ’’شعب الإیمان‘‘ میں اس حدیث کی تخریج کی ہے، واللہ اعلم۔
علامہ ابن عر اق رحمہ اللہ (المتوفی۹۶۳ھ) ’’تنزیه الشریعة‘‘[11] میں حافظ ابن جَوزِی رحمہ اللہ کے کلام اور علامہ سُیوطِی رحمہ اللہ کے تعاقب کو نقل کرکے لکھتے ہیں:
’’قلتُ: وکذلک أشَارَ الذَهَبي في ’’تلخیص الموضوعات‘‘ إلی ضُعْفِه مِنْ جِهَةِ یاسین، ثم اسْتَدْرَکَ فقال: ولکن في سَنَدِه هَنَّاد النسفي، واﷲ أعلم‘‘.
میں(ابن عَرَّاق رحمہ اللہ )کہتا ہوں کہ ذَہَبِی رحمہ اللہ نے’’تلخیص الموضوعات‘‘ میں یاسین کی جانب سے اس حدیث کے ضعف کی طرف اشارہ کیا تھا، پھر حافط ذَہَبِی رحمہ اللہ نے استدراکاً کہا: لیکن اس حدیث کی سند میں ہناد النسفی ہے، واﷲاعلم۔
واضح رہے کہ ’’هناد النسفی‘‘ علامہ ابن جَوزِی رحمہ اللہ کی سند میں ہے، لیکن علامہ بیہقی رحمہ اللہ کی سند میں نہیں ہے؛ اس لئے ہناد النسفی کی مجروحیت بیہقی رحمہ اللہ کی سند کےلئے مضر نہیں ہے، البتہ دوسرا متکلم فیہ راوی، یاسین بن معاذ دونوں سندوں میں ہے۔
یہ بھی واضح رہے کہ بذاتِ خود حافظ ابن عراق رحمہ اللہ نے یاسین کو وضاعین کی فہرست میں شمار کیا ہے۔ (تنزیه الشریعة:۱/۱۲۵)۔
محدثینِ عظام کے کلام کا خلاصہ یہ ہے کہ علامہ ابن جَوزِی رحمہ اللہ ، حافظ ذَہَبِی رحمہ اللہ اور امام شَوکانی رحمہ اللہ نے یاسین بن معاذ الزیات کو متہم قرار دے کر اس روایت کو ’’موضوع‘‘ کہا ہے، البتہ امام بیہقی رحمہ اللہ نے زیرِ بحث روایت تخریج کرنے کے بعد ’’یاسین بن معاذ ضعیف‘‘ کہنے پر اقتصار کیا ہے، اور علامہ سُیوطِی رحمہ اللہ نے بھی علامہ ابن جَوزِی رحمہ اللہ کے تعاقب میں صرف بیہقی رحمہ اللہ کی روایت نقل کی ہےاور مزید کوئی کلام نہیں کیا، اسی طرح حافظ سخاوی رحمہ اللہ نے حدیث جریج کےلئے امام بیہقی رحمہ اللہ کی روایت کو بطور شاہد نقل کیا ہے، اور امام بیہقی رحمہ اللہ کے مذکورہ کلام کی تفصیل ہم لکھ چکے ہیں کہ امام بیہقی رحمہ اللہ کا یہ کلام، محدثین کے منہج کے مطابق ضعفِ خفیف اور ضعفِ شدید دونوں کا احتمال رکھتا ہے، پھر بعد میں امام بیہقی رحمہ اللہ کا قول بھی مل گیا، جس میں آپ نے ایک دوسرے مقام پر یاسین کو صاف لفظوں میں ’’متروک‘‘ کہا ہے؛ اس لئے امام بیہقی رحمہ اللہ کا یہ قول روایت کے قابلِ بیان ہونے کےلئے ہرگز کافی نہیں ہے، بہرحال یہ بات بخوبی معلوم ہوچکی ہے کہ اس روایت میں محدثینِ کرام کے کلام کا مدار یاسین بن معاذ ہے، لہذا ذیل میں یاسین بن معاذ کے بارے میں ائمہ رجال کے تفصیلی اقوال لکھے جائیں گے۔
حافظ ذَہَبِی رحمہ اللہ ’’میزان الاعتدال‘‘[12] میں لکھتے ہیں:
’’وکان مِنْ کِبَارِ فُقَهَاءِ الکُوفَِة ومُفْتِیْهَا، وأصله یَمَامِيّ، یکنی أبا خلف، قال ابن مَعِین: لیس حدیثُه بِشَيء، وقال البخاري: مُنْکَرُ الحَدِیثِ، وقال النسائي وابن الجُنید: متروکٌ، وقال ابن حِبّان: یروي الموضوعات ...‘‘.
’’یاسین بن معاذ کا شمار کوفہ کے بڑے فقہاء اور مفتیوں میں ہوتا تھا، یاسین اصل میں یمامہ کا رہنے والا تھا،جس کی کنیت ابو خلف تھی،یاسین کے بارے میں ابن مَعِین رحمہ اللہ نے ’’لیس حدیثه بشيء‘‘ (کلمۂ جرح)، بخاری رحمہ اللہ نے ’’منکر الحدیث‘‘ (کلمۂ جرح) اورنسائی رحمہ اللہ اور ابن جنید رحمہ اللہ نے ’’متروک‘‘ (کلمۂ جرح) کہا ہے،اور ابن حِبّان رحمہ اللہ فرماتے ہیں کہ وہ حدیثیں گھڑتا تھا۔۔۔‘‘۔
حافظ ابو حاتم محمد بن ادریس التیمی[13] رحمہ اللہ فرماتے ہیں:
’’كان رجلاً صالحاً، لا يَعْقِلُ ما يُحَدِّثُ به، ليس بقويّ، مُنْكَرُ الحديث‘‘.
یاسین نیک شخص تھا،جن حدیثوں کو بیان کرتا تھا وہ خودبھی انھیں نہیں سمجھتا تھا، یاسین ’’قوي‘‘ نہیں تھا، ’’منکر الحدیث‘‘ (کلمۂ جرح)تھا۔
امام ابو سعد عبد الکریم بن محمدالتمیمی السمعا نی رحمہ اللہ ’’الأنساب‘‘[14] میں فرماتے ہیں:
’’مِنْ أهل الکوفة، انْتَقَلَ إلی الیَمَامَة وأقَامَ، ثم سَکَنَ الحِجَازَ، یروي عن أبي الزبیر والزهري، روی عنه عبد الرزاق، کان مِمَّنْ یَروِي الموضوعات عن الثِّقَات، ویَتَفَرَّدُ بالمُعْضَلات عن الأثبات، لا یجوز الاحْتِجَاج به بِحَالٍ‘‘.
یاسین کوفی تھا،پھر یمامہ منتقل ہو کر وہاں اقامت اختیار کی،پھرحجاز میں سکونت اختیار کرلی، ابو الزبیر اور زہری سے روایت نقل کرتا تھا، اور عبد الرزاق، یاسین سے حدیثں نقل کرتا تھا، یاسین ثقہ راویوں کی طرف منسوب کرکے روایتیں گھڑتا تھا،اور ’’أثبات‘‘ (معتبراورثقہ راویوں)سے ’’مُعْضَلات‘‘ نقل کرنے میں متفرد (تنہا) ہوتا تھا، (چنانچہ) یاسین سے احتجاج بہر صورت جائز نہیں ہے۔
حافظ ابن حجر رحمہ اللہ (۸۵۲ھ) ’’لسان المیزان‘‘[15]میں رقمطراز ہیں:
’’وقال الجوزْجَانِي: لم یَرْض الناسُ حدیثَه، وقال النسائي في ’’التمییز‘‘: لیس بِثِقَةٍ، ولا یُکْتَبُ حَدِیثُه، وقال أبو زُرعة: ضعیف، وقال أبو داود: کان یذهب إلی الإرجاء، وهو متروکُ الحدیث، ضعیف، وهو بِبَیْعِ الزیت أعلم منه بالعلم، وقال ابن عدي: وکل روایاته أو عامتها غیر محفوظة، قال الحاکم والنقاش: روی المناکیر، وقال أبو أحمد الحاکم: لیس بالقوي عندهم، وذکره العُقَیْلِي، والد ولابي، وابن الجارود، وابن شاهین في ’’الضعفاء‘‘.
اور جوزجانی رحمہ اللہ فرماتے ہیں کہ لوگ یاسین کی حدیثوں سے راضی نہیں تھے، نسائی رحمہ اللہ فرماتے ہیں کہ یاسین ’’ثقة‘‘ نہیں ہے، اور اس کی حدیثیں نہ لکھی جائیں۔
ابو زُرعہ رحمہ اللہ نے یاسین کو ’’ضعیف‘‘ کہا ہے،اور ابو داود رحمہ اللہ فرماتے ہیں کہ وہ ’’إرجاء‘‘ کی جانب چلتا تھا (یعنی اعتقاد رکھتا تھا)، اور وہ ’’متروک الحدیث‘‘ (کلمۂ جرح)، اور ’’ضعیف‘‘ ہے، اور وہ علم سے زیادہ تیل بیچنا جانتا تھا۔
ابن عَدِی رحمہ اللہ فرماتے ہیں کہ یاسین کی ساری یا اکثر حدیثیں ’’محفوظ‘‘ نہیں ہیں۔
حاکم رحمہ اللہ اور نقاش رحمہ اللہ فرماتے ہیں کہ یاسین ’’مناکیر‘‘ نقل کرتا تھا (کلمۂ جرح)۔
خلیلی رحمہ اللہ نے یاسین کو ’’ضعیف جداًّ‘‘ (کلمۂ جرح)کہا ہے۔
اور ابو احمد حاکم رحمہ اللہ فرماتے ہیں کہ یاسین محدثین کے نزدیک ’’قوی‘‘ نہیں تھا۔
اور عقیلی رحمہ اللہ ، دولابی رحمہ اللہ ، ابن جارود رحمہ اللہ ، اور ابن شاہین رحمہ اللہ نے یاسین کو ’’ضعیف‘‘ کہا ہے۔
امام حاکم نیشاپوری رحمہ اللہ ’’المدخل إلی الصحیح‘‘ میں فرماتے ہیں: ’’روی عن عمرو بن دینار وأبي الزبیر وغیرهما من الثقات الموضوعات‘‘. یہ عمرو بن دینار اور ابوزبیر جیسے ثقہ راویوں کے انتساب سے من گھڑت روایات نقل کرتا ہے۔ (رقم:۲۳۳، مؤسسة الرسالة ـ بیروت)
یاسین بن معاذ کے بارے میں ائمہ رجال کے اقوال آپ کے سامنے تفصیل سے آچکے ہیں،ان تمام ائمہ رجال نے یاسین بن معاذ کو ضعیف ہی قرار دیا ہے، اور علامہ ابن حِبّان رحمہ اللہ ، حافظ ابو حاتم رحمہ اللہ ، امام بخاری رحمہ اللہ ، امام نسائی رحمہ اللہ ، حافظ ابن جنید رحمہ اللہ ، امام ابو داؤد رحمہ اللہ ، امام خلیلی رحمہ اللہ ، امام حاکم رحمہ اللہ ، حافظ نقاش رحمہ اللہ ، امام ابن جَوزِی رحمہ اللہ ، حافظ سَمْعانی رحمہ اللہ ، حافظ ذَہَبِی رحمہ اللہ اور علامہ شَوکانی رحمہ اللہ وغیرہ تمام محدثین نے یاسین بن معاذ کے بارے میں صاف اور جرح کے شدید فنی الفاظ استعمال کیے ہیں، مثلاً:
’’مُنْکَرُ الحَدِیث‘‘. (امام بخاری رحمہ اللہ یہ کلمہ اکثر شدید جرح کےلئے استعمال کرتے ہیں)۔
’’متروکٌ‘‘. (امام نسائی رحمہ اللہ ، حافظ ابن جنید رحمہ اللہ ، امام بیہقی رحمہ اللہ ، حافظ ذَہَبِی رحمہ اللہ )۔
’’ضعیف جداًّ‘‘. (حافظ خلیلی رحمہ اللہ )۔
’’متروک الحدیث‘‘. (حافظ ابو زُرعہ رحمہ اللہ )۔
’’من گھڑت روایات نقل کرتا ہے‘‘ (امام حاکم نیشاپوری رحمہ اللہ )۔
’’یاسین ثقہ راویوں کی طرف منسوب کرکے روایتیں گھڑتا تھا‘‘ (حافظ سَمْعانی رحمہ اللہ ، حافظ ابن حِبّان رحمہ اللہ )۔
’’اس حدیث میں یاسین بن معاذ آفت ہے‘‘ (علامہ شَوکانی رحمہ اللہ )۔
حاصل یہ ہے کہ ان متقدمین ومتاخرین علماء کی سابقہ تصریحات کے مطابق، زیرِبحث روایت کسی بھی طرح ضعفِ شدید سے خالی نہیں ہے، یہی وجہ ہے کہ حافظ ابن جَوزِی رحمہ اللہ ، حافظ ذَہَبِی رحمہ اللہ ، اور علامہ شَوکانی رحمہ اللہ نے اس روایت کو’’ موضوع ‘‘ تک کہا ہے؛ اس لئے ان تمام نصوص کا قدر ِمشترک اور اتفاقی نتیجہ یہی ہے کہ یہ روایت ضعفِ شدید سے کسی بھی صورت میں خالی نہیں رہ سکتی؛ اس لئے زیرِ بحث روایت کو فضائل کے باب میں بھی بیان کرنا جائز نہیں ہے؛ کیونکہ جمہور علما کے نزدیک ضعیف حدیث پراگرچہ فضائل کے باب میں عمل کرنا جائز ہے،البتہ حافظ ابن حجر رحمہ اللہ کے حوالے سے یہ بات گزر چکی ہے کہ اس جوازِ عمل کےلئے اتفاقی شرط یہ ہے کہ حدیث ِضعیف، ضُعفِ شدیدسے خالی ہو۔
یہاں ایک دوسرا اہم نکتہ بھی مدِ نظر رہے کہ ائمہ سابقین یعنی امام بخاری رحمہ اللہ ، امام ابو حاتم رحمہ اللہ ، حافظ ابن عَدِی رحمہ اللہ ، امام حاکم رحمہ اللہ ، امام نقاش رحمہ اللہ اور علامہ سَمْعانی رحمہ اللہ نے یاسین بن معاذ کے بارے میں یہ وضاحت بھی صاف لفظوں میں کی ہے کہ یاسین ’’منکر الحدیث‘‘ہے اور وہ’’مناکیر‘‘ نقل کرتا تھا،نیز ان کی روایتیں غیر محفوظ ہیں جن میں وہ متفرد (تنہا) ہوتا ہے،اب آپ یاسین بن معاذ کی زیرِ بحث روایت کو ان اقوال کی روشنی میں عین منطبق پائیں گے،کیونکہ یہ روایت مجروح راوی یاسین بن معاذ کی سند ہی سے مروی ہے،اور وہ اس میں متفرد ہے (یعنی یاسین بن معاذ کے علاوہ کوئی دوسرا راوی اس روایت کو نقل کرنے والا نہیں ہے) نیز ظاہری حدیث بھی نکارت پر مشتمل ہے، چنانچہ اصول حدیث کے مطابق یہ روایت منکر بھی کہلائے گی۔ حاصل یہ ہے کہ یاسین بن معاذ جیسے راوی کی حدیث تفرد اور نکارت کی صورت میں، روایت کو مزید ’’ساقط الاعتبار‘‘ بنا دیتی ہے۔
یہاں تک کی توضیحات کا بے غبار نتیجہ تکرار سے ماقبل میں آتا رہا ہے کہ زیرِ تبصرہ روایت، بہر صورت ضعفِ شدید پر مشتمل ہے،اور اسے حافظ ابن جوزی رحمہ اللہ ، حافظ ذَہَبِی رحمہ اللہ اور امام شوکانی رحمہ اللہ نے ’’من گھڑت‘‘ کہا ہے، اور حافظ ابن حجر رحمہ اللہ کی تصریح کے مطابق جمہور علماء کے نزدیک فضائل کے باب میں بھی ایسی روایت بیان کرنا جائز نہیں ہے،جیسا کہ تفصیل ماقبل میں گزر چکی ہے۔
حوالہ جات
[1] القول البديع:خاتمة:496،ت:محمد عوامة،دار اليسر ـ المدينة المنورة،الطبعة الثانية1428هـ .
[2] شعب الإيمان:الخامس والخمسون من شعب الإيمان،10/284،رقم:7497،ت:الدكتور مختار أحمد الندوي،مكتبة الرشد ـ الرياض،الطبعة الأولى 1423هـ .
[3] الموضوعات:باب بر الوالدين:۳/۸۵ ،ت:عبد الرحمن محمد عثمان،المكتبة السلفية ـ المدينة المنورة، الطبعة الأولى۱۳۸۶هـ .
[4] الإكمال في رفع الإرتياب:قرير:7/108،الأستاد نايف العباس،دار الكتاب الإسلامي ـ قاهرة .
[5] الموضوعات:باب بر الوالدين:3/85 ،ت:عبد الرحمن محمد عثمان،المكتبة السلفية ـ المدينة المنورة، الطبعة الأولى۱۳۸۶هـ .
[6] تلخيص الموضوعات:كتاب البر،ص:279،رقم:752،ت:أبو تميم ياسر،مكتبة الرشد ـ الرياض،الطبعة الأولى۱۴۱۹هـ .
[7] الفوائد الجموعة:كتاب الزهد والأدب والطب وعيادة المريض،1/230،رقم:36،ت:عبد الرحمن بن يحيى، دار الكتب العلمية ـ بيروت،الطبعة۱۴۱۶هـ .
[8] المقاصد الحسنة:حرف اللام،ص::399، رقم:898،ت:عبد الله محمد الصديق،دار الكتب العلمية ـ بيروت، الطبعة الثانية1427هـ .
[9] فتح الباري: كتاب العمل في الصلاة، باب:إذا دعت الأم والدها...:3/78،دار المعرفة ـ بيروت .
[10] اللآلئ المصنوعة:2/250،ت:محمد عبد المنعم رابح،دار الكتب العلمية ـ بيروت،الطبعة الثانية۱۴۲۸هـ .
[11] تنزيه الشريعة:كتاب الأدب والزهد والرقائق،الفصل الأول:2/296،رقم:49،ت:عبد الوهاب عبد اللطيف وعبد الله محمد الصديق،دار الكتب العلمية ـ بيروت،الطبعة الثانية1401هـ .
[12] ميزان الاعتدال:4/358،رقم:9443،تحقيق:علي محمد البجاوي،ناشر:دار المعرفة ـ بيروت .
[13] الجرح والتعدیل:باب الياء،9/380،رقم الترجمة:17005،ت:مصطفى عبد القادر عطا،دار الكتب العلمية ـ بيروت،الطبعة الأولى1422هـ .
[14] الأنساب:باب الزاء والياء،/2043،رقم:1363،مجلس دائرة المعارف العثمانية ـ حيدر آباد الدكن ـ الهند،الطبعة الاولى1397هـ .
[15] لسان الميزان:8/413،رقم:8405،ت:عبد الفتاح أبو غدة،دار البشائر الإسلامية ـ بيروت،الطبعة ۱۴۲۳هـ .