[قرنِ صحابہ گذر جانے کے بعد کسی جن صحابی کے دیکھنے سے برتقدیرِ صحت میری ناقص رائے میں تابعیت کا شرف حاصل نہ ہوگا، اس لئے کہ یہ فضیلت قرن کے ساتھ خاص ہے]
تحقیق کی تفصیل
’’سوال: کچھ لوگ یہ کہتے ہیں کہ ان کی جنات صحابی سے ملاقات ہوتی ہے، اور ان سے وہ لوگ بیعت واکتساب فیض کرتے ہیں۔
اب دریافت طلب یہ امر ہے کہ اگر ان سے بشکل انسانی کوئی آدمی ملاقات کرے تو وہ تابعین میں شمار ہوگا یا نہیں؟ اور ان سے دینی فیض بذریعہ بیعت وغیرہ ہوسکتا ہے یا نہیں؟ اور خیر القرون میں باہم جنات وانسان میں اس طرح بیعت اور رشد وہدایت اور فیض رسانی کا سلسلہ قائم ہوا ہے یا نہیں؟ اور اب ہوسکتا ہے یا نہیں؟
جواب: حضرت ابن عمر رضی اللہ عنہ فرماتے ہیں:
×صلى النبي صلى الله عليه وسلمصلوة في آخر حياته، فلما سلم قام النبي صلى الله عليه وسلمفقال: أرأيتَكم ليلتكم هذه! فإن رأس مائة سنة لايبقي ممن هو اليوم على ظهر الأرض أحد. رواه البخاري (ص: ۸۴) ومسلم÷ (۳۱۰/۲).
[نبی ﷺ نے ایک دفعہ اپنی عمر کے آخری حصہ میں نماز پڑھائی،سلام پھیرنے کے بعد آپ ﷺ کھڑے ہو گئے اور فرمایا: تم یہ رات دیکھ رہے ہو (اسے یاد رکھو)، کیونکہ آج روئے زمین پر رہنے والوں میں کوئی بھی سو سال کے ختم تک باقی نہیں رہے گا۔ اس روایت کو بخاری رحمہ اللہ ومسلم رحمہ اللہ نے تخریج کیا ہے]
ابو سعید خدری رضی اللہ عنہ فرماتے ہیں:
×لما رجع النبي صلى الله عليه وسلممن تبوك سألوه عن الساعة، فقال رسول الله صلى الله عليه وسلم: لاتأتي مائة سنة وعلى الأرض نَفْس منفوسة اليوم. رواه مسلم÷.
[جب آپ ﷺ تبوک سے واپس تشریف لائے تو صحابہ رضی اللہ عنہم نے آپ ﷺ سے قیامت کے بارے میں پوچھا، رسول اللہ ﷺ نے ارشاد فرمایا:آج جو بھی ذی نفس روئے زمین پر موجود ہے، اس پر سو سال نہیں گزریں گے درحالیکہ وہ زندہ ہو۔ اسے مسلم رحمہ اللہ نے تخریج کیا ہے]
اور حضرت جابر رضی اللہ عنہ فرماتے ہیں:
×سمعت النبي صلى الله عليه وسلميقول قبل أن يموت بشهر: ما على الأرض من نَفْس منفوسة لاتأتي عليها مائة سنة. رواه مسلم (۳۱۰/۲)÷.
[آپ ﷺ کے انتقال سے ایک ماہ قبل میں نے نبی ﷺ کا ارشاد سنا: جو بھی ذی نفس روئے زمین پر موجود ہے، اس پر سو سال نہیں گزریں گے درحالیکہ وہ زندہ ہو۔ اسے مسلم رحمہ اللہ نے تخریج کیا ہے]
ان احادیث کی وجہ سے حضرات محدثین فرماتے ہیں کہ جو شخص وفات ِنبوی کے سو سال بعد صحابیت کا دعوی کرے وہ کاذب ہے، حضرت عیسیٰ علیہ السلام چونکہ آسمان پر اٹھا لئے گئے اور ابلیس لعین کو اللہ تعالیٰ نے ﴿إِنَّكَ مِنَ الْمُنْظَرِيْن﴾ فرماکر مہلت دیدی، اس لئے ان کا استثناء ذکر کیا ہے، اسی طرح حضرات صوفیہ اور بعض محدثین جیسے ابو القاسم السہیلی رحمہ اللہ ، حافظ ابن الصلاح رحمہ اللہ ، امام نَوَوِی رحمہ اللہ حضرت خضر علیہ السلام کو مستثنی مانتے ہیں،کیونکہ ان حضرات کی رائے پر وہ زندہ ہیں، امام نَوَوِی رحمہ اللہ فرماتے ہیں:ہوسکتا ہے کہ حضرت خضر علیہ السلام ارشاد نبوی کے وقت سمندر میں ہوں۔
کسی روایت سے اس کی نفی یا اثبات معلوم نہیں ہوتا ہے، ظاہر یہ ہے کہ وہ بھی داخل ہیں، لہٰذا محدثین کے اصول کے مطابق کسی ’’جن‘‘ کا مدتِ مذکورہ کے بعد صحابیت کا دعوی غیر معتبر ہے، اور اگر یہ تسلیم کرلیا جائے کہ’’ جن‘‘ حدیث کے عموم میں داخل نہیں ہیں، اس لئے کہ حدیث میں بظاہر انسانوں کو مراد لیا گیا تو ’’جن‘‘ کا قول مانا جاسکتا ہے۔
لیکن جنات بکثرت دروغ گوئی کرتے ہیں اور ہمارے پاس ان کے صدق وکذب کا کوئی قطعی قرینہ نہیں ہے،اس لئے اس میں توقف کرنا چاہیئے، ہاں قرائن سے تصدیق وتکذیب کا رجحان حاصل ہوسکتا ہے۔
حضور اقدس ﷺ رسول الثقلین تھے، اس لئے جیسے آدمیوں کو آپ ﷺ کی صحبت سے صحابیت کا رتبۂ عالیہ حاصل ہوا اسی طرح جنات کو بھی یہ مرتبہ ملا، اسی لئے محدثین نے ان بعض’’جن‘‘ صحابہ کے اسماء اپنی کتابوں میں درج کئے ہیں، جن کا کسی طرح پتہ چل گیا، اب جس طرح انسانی صحابی کی روایت وصحبت سے تابعیت کا شرف حاصل ہوجاتا ہے اسی طرح جن صحابی کی روایت وصحبت سے بھی یہ شرف حاصل ہوگا۔
لیکن قرنِ صحابہ گذر جانے کے بعد کسی ’’جن‘‘ صحابی کے دیکھنے سے برتقدیرِ صحت میری ناقص رائے میں تابعیت کا شرف حاصل نہ ہوگا، اس لئے کہ یہ فضیلت قرن کے ساتھ خاص ہے، جو ایک مخصوص زمانہ، چالیس یا پچاس یا ساٹھ یا ستر یا اسی یا سو یا ایک سو دس یا ایک سو بیس سال پر علی اختلاف الاقوال بولاجاتا ہے، اور بعض کی رائے پر قرن ایک زمانہ کے ان متقارب لوگوں پر بولاجاتا ہے، جو کسی امر مقصود میں شریک ہوں۔
ان دونوں تفسیروں پر حدیث: ×خير القرون قرني، ثم الذين يلونهم، ثم الذين يلونهم÷ [بہترین زمانہ میرا زمانہ ہے، پھر ان لوگوں کا زمانہ جو اس کے قریب ہوں، پھر ان لوگوں کا جو ان کے زمانہ کے قریب ہوں] کی فضیلت مابعد کے زمانوں میں بظاہر حاصل نہ ہوگی، ہاں ملاقات موجبِ برکت ہوگی۔
جنات سے بیعت وغیرہ کی ہمارے علم میں کوئی اصل نہیں ہے، اور نہ قرون مشہود لہا بالخیر میں اس کا کوئی پتہ چلتا ہے، ویسے کسی’’ جن‘‘ سے اعتماد ویقین وتجربہ کے بعد اکتسابِ علوم وفوائد میں بظاہر کوئی قباحت معلوم نہیں ہوتی ہے [1]۔
حوالہ جات
[1] الیواقیت الغالیۃ:اگر جن صحابی سے بشکل انسانی کوئی ملاقات کرلے تو کیا تابعی شمار ہوگا؟۲/۱۵۴ - ۱۵۶۔