روایت: آپ ﷺ کا وِصال سے قبل اپنی ذات پر قصاص اور بدلہ دِلوانا۔

خاتم الانبیاء سرورکونین حضرت محمد ﷺ کی حیاتِ مبارکہ کاہر ہر جزء انسانیت ساز پیغام سے لبریزہے۔ آپ کی کمالِ عبدیت رحمتِ عرشِ بریں کا فیضان ہے، جو تاقیامت شریعت اسلامیہ کے محفوظ منہج پر انسانیت کو سامانِ رشدوہدایت پہنچانے کی ضامن ہے، آپ ﷺ کے جامع، معیاری اور نجات دہندہ شب وروز، اسانید وتواتر کے ما مون اور معتبر راستے سے ہم تک پہنچے ہیں، اس لئے عدل وصلاح پر مشتمل، اس اسلامی تا ریخ کو تخلیط و تدلیس کی قطعاً حاجت نہیں، بلکہ دینی علوم میں اس افراط کو سمّ قاتل سمجھا جاتا ہے، چنانچہ جامع العلوم علّامہ عبد الحی لکھنوی l (۱۳۰۴ھ)لکھتے ہیں:

’’ولْیَحذر القصّاص والخُطَباء الأمرون الزَّاجرون حیثُ ینسبون کثیراً مِن الأمور إلی الحَضْرَة المُقَدَّسَة التي لم یَثبُتْ وجودُها فیها، ویَظُنُّون أنَّ في ذلک أجراً عظیماً، لإثبات فضْل ذاتِ المُقَدَّسَة وعُلُوِّ قَدْرِها، ولا یَعْلَمُون أنَّ في الفضائل النَّبَوِیَّة التي ثَبَتَتْ بالأحادیث الصَّحِیحَة غُنْیَةً عن تلک الأکاذیب الواهِیة...‘‘[1].

’’امر و زجر کرنے والے قصہ گو اور خطباء کو اس سے ڈرنا چاہیے کہ وہ حضور اقدس ﷺ کی جانب ایسی بہت سے باتیں منسوب کرتے ہیں جوآپ سے ثابت نہیں ہیں (یعنی معتبر سند سے ثابت نہیں ہے)، اور یہ سمجھتے ہیں کہ اس میں اجر عظیم ہے، کیوں کہ اس میں آپ کی فضیلت اور علو شان کا بیان ہے، اور وہ یہ نہیں جانتے کہ جو فضائل نبویہ احادیث صحیحہ سے ثابت ہیں، وہ ان واہی جھوٹے فضائل سے مستغنی کرنے والے ہیں۔۔۔‘‘۔

آپﷺ کے عدل کی نظیر تلاش کرنا ایک بے سود امر ہے، آپﷺ سراپا انصاف کے پر تو ہیں، جس کا ثبوت اسلامی مُسْنَد روایتیں اور ان کا تواتر ہے، اس لیے شریعت ایسی حکایات کی مداخلت ہرگز برداشت نہیں کرتی جن کا کوئی شرعی ثبوت نہ ہو، بلکہ من گھڑت روایت کوبیان کرنے پر سخت وعیدیں وارد ہوئی ہیں، اس لئے ہماری مجالس میں جہاں اس بات کی ضرورت ہے کہ وہ فکرِ آخرت اور اسلامی تعلیمات سے مزین ہوں، وہاں اسے غیر معتبر اور من گھڑت حکایات سے بچانا بھی اہم ترین فریضہ ہے، چنانچہ اسی مقصد کے پیشِ نظر ذیل میں آپ ﷺ کے عدل وانصاف پر مشتمل ایک ایسی ہی روایت ذکر کی جائے گی، جو من گھڑت ہونے کے باوجود زبان زَدعام ہے، اس لئے اس کو بیان کرنے سے شدت سے احتراز کرنا چاہیے۔