روایت:’’رسول اللہ ﷺ کا ارشاد ہے: ’’من ترك سنتي لم ينل شفاعتي‘‘. جس نے میری سنت ترک کی وہ میری شفاعت نہیں پائے گا‘‘۔

نیز ضمنی طور پر اس سے ملتی جلتی ایک مسند روایت کی بھی تحقیق کی گئی ہے، جس کے الفاظ یہ ہیں: ’’وہ فرشتہ جو میری اس مسجد پر مقرر ہے، وہ روزانہ ندا کرتا ہے: جس نے محمد ﷺ کی سنت کو چھوڑا ، وہ حوض کوثر پر نہیں پہنچ پائے گا‘‘، اس ضمنی روایت کو حافظ خطیب بغدادی l رحمہ اللہ  نے ’’منکر‘‘ کہا ہے، حافظ ابن جوزی l رحمہ اللہ  نے اسے ’’من گھڑت‘‘ روایات میں شمار کیا ہے، اور حافظ ذہبی l رحمہ اللہ  نے ’’جھوٹی خبر‘‘ کہا ہے، تفصیل ذیل میں ملاحظہ فرمائیں۔

زیر بحث روایت علامہ عبدالعزیز بخاریl رحمہ اللہ (المتوفی ۷۳۰ھ) نے ’’ کشف الأسرار‘‘[1] میں بلا سند ان الفاظ سے نقل کی ہے:

’’وقوله صلى الله عليه وسلم: من ترك سنتي لم ينل شفاعتي‘‘. آپ ﷺ کا ارشاد  ہے: جس نے میری سنت  ترک کی    وہ  میری شفاعت نہیں پائے گا۔

زیر بحث روایت علامہ کمال الدین بابرتی l رحمہ اللہ (المتوفی ۷۸۶ھ) نے ’’العناية‘‘[2] میں، علامہ تفتازانی  l رحمہ اللہ (المتوفی ۷۹۳ھ) نے ’’شرح التلویح على التوضیح‘‘[3] میں، علامہ شمس الدین محمد بن حمزہ فناری l رحمہ اللہ (المتوفی ۸۳۴ھ)نے  ’’فصول البدائع‘‘[4] میں، حافظ بدر الدین عینی l رحمہ اللہ  (المتوفی ۸۵۵ھ) نے ’’البناية‘‘[5]میں،  علامہ شمس الدین قاضی زادہ l رحمہ اللہ (المتوفی988ھ) نے ’’ تكملة شرح فتح القدير‘‘[6] میں، علامہ حصکفی l رحمہ اللہ (المتوفی ۱۰۸۸ھ) نے’’الدر المختار‘‘[7] میں، علامہ محمد علی تھانوی l رحمہ اللہ (المتوفی بعد ۱۱۵۸ھ) نے ’’ كشاف اصطلاحات الفنون‘‘[8] میں اور علامہ طحطاوی l رحمہ اللہ (المتوفی ۱۲۳۱ھ) نے ’’حاشية الطحطاوي‘‘[9] میں بلا سند نقل کی ہے۔

تفصیل گزر چکی ہے کہ زیرِ بحث روایت مذکورہ الفاظ سے سنداً  نہیں ملتی، تاہم اس سے ملتی جلتی ایک مسند روایت حافظ خطیب بغدادی l رحمہ اللہ   نے ’’تاریخ بغداد‘‘[10] میں ان الفاظ سے تخریج کی ہے:

’’أخبرنا القاضي أبو العلاء محمد بن علي بن يعقوب الواسطي، قال: حدثنا أبو الحسن أحمد بن جعفر بن محمد بن الفرج الخلال المقرئ، قال: حدثنا أبو حامد أحمد بن رجاء بن عبيدة قدم علينا للحج سنة عشر وثلاث مائة، قال: حدثنا محمد بن محمد بن إسحاق البصري، قال: حدثنا سويد بن نصر البلخي، قال: حدثنا ابن المبارك، قال: حدثنا سفيان الثوري، عن حماد، عن إبراهيم، عن علقمة، قال: قال عبد الله: قال رسول الله صلى الله عليه وسلم: لله ثلاثة أملاك: ملك موكل بالكعبة، وملك موكل بمسجدي هذا، وملك موكل بالمسجد الأقصى.

فأما الموكل بالكعبة، فينادي في كل يوم: من ترك فرائض الله خرج من أمان الله، وأما الموكل بمسجدي هذا، فينادي في كل يوم: من ترك سنة محمد صلى الله عليه وسلم لم يرد الحوض، ولم تدركه شفاعة محمد صلى الله عليه وسلم، وأما الملك الموكل بالمسجد الأقصى، فينادي في كل يوم: من كان طعمته حراما كان عمله مضروبا به حر وجهه‘‘.

حضرت عبداللہ بن مسعود r رضی اللہ عنہ  سے مروی ہے کہ رسول اللہ ﷺ نے فرمایا: اللہ تعالی کے تین فرشتے ہیں، ایک فرشتہ جو کعبہ پر مقرر ہے، ایک فرشتہ جو میری اس مسجد پر مقرر ہے، اور ایک فرشتہ جو مسجد اقصی پر مقرر ہے۔

وہ فرشتہ جو کعبہ پر مقرر ہے وہ روزانہ ندا کرتا ہے: جس نے اللہ کے فرائض کو ترک کیا وہ اللہ کی امان سے نکل گیا، اور وہ فرشتہ جو میری اس مسجد پر مقرر ہے، وہ روزانہ ندا کرتا ہے: جس نے محمد ﷺ کی سنت کو چھوڑا ، وہ حوض کوثر پر نہیں پہنچ پائے گا اور اسے محمد ﷺ کی شفاعت حاصل نہ ہوگی، اور وہ فرشتہ جو مسجد اقصی پر مقرر ہے، وہ  روزانہ ندا کرتا ہے: جس کا کھانا حرام کا ہوگااس کا عمل اس کے چہرے پر مارا جائے گا۔

زیر بحث روایت حافظ  ابن جوزی l رحمہ اللہ  نے  ’’ كتاب الموضوعات‘‘[11] میں اور حافظ ضیاء الدین مقدسی l رحمہ اللہ  نے’’فضائل بیت المقدس‘‘[12] میں حافظ خطیب بغدادی l رحمہ اللہ  کے طریق سے تخریج کی ہے۔

حافظ  خطیب بغدادی l رحمہ اللہ  ’’تاریخ بغداد‘‘[13] میں زیربحث روایت تخریج کرنے کے بعد فرماتے ہیں:

   ’’هذا حديث منكر، ورجال إسناده كلهم ثقات معروفون، سوى البصري وأحمد بن رجاء، فإنهما مجهولان‘‘.یہ حدیث منکر ہے، اس کی سند کے تمام راوی ثقہ اور معروف ہیں سوائے بصری اور احمد بن رجا کے، وہ دونوں مجہول ہیں۔

حافظ ابن جوزی l رحمہ اللہ نےاس ضمنی روایت کو’’ الموضوعات‘‘[14]  میں حافظ خطیب بغددادی l رحمہ اللہ  کے طریق  سے تخریج کر کے حافظ خطیب بغدادی l رحمہ اللہ   کے قول پر اکتفاء کیا ہے۔

حافظ ذہبی l رحمہ اللہ  نے’’میزان الاعتدال‘‘[15]  میں احمد بن رجا کے ترجمہ میں یہ روایت نقل  کرکے حافظ خطیب  بغدادی l رحمہ اللہ کے کلام پر اکتفاء کیا ہے، اسی طرح حافظ ضیاالدین مقدسی l رحمہ اللہ نے’’فضائل بیت المقدس‘‘[16] میں حافظ خطیب بغدادی l رحمہ اللہ  کے  کلام پر اکتفاء کیا ہے۔

حافظ ابن حجر عسقلانی l رحمہ اللہ نے ’’ لسان المیزان‘‘[17]  میں حافظ ذہبی l رحمہ اللہ کے کلام پر اکتفاء کیا ہے۔

حافظ ذہبی l رحمہ اللہ   زیر بحث سند میں موجود راوی محمد بن محمد بن اسحاق   کے ترجمہ میں لکھتے ہیں: ’’شيخ بصري، روى عن سويد بن نصر المروزي، أتى بخبر كذب، وعنه أحمد بن رجاء، لا يعرف أيضا‘‘[18].

محمد بن محمد بن اسحاق، بصری شیخ ہے، یہ سوید بن نصر مروزی سے روایت کرتا ہے، یہ ایک جھوٹی خبر لایا ہے، اس سے احمد بن رجا نے روایت کی ہے، جو خود بھی  معروف نہیں ہے۔

حافظ ابن حجر عسقلانی l رحمہ اللہ  نے ’’لسان المیزان‘‘[19] میں حافظ ذہبی l رحمہ اللہ  کے  کلام پر اکتفاء کیا ہے۔

علامہ سیوطی l رحمہ اللہ ’’اللآلئ المصنوعة‘‘[20] میں حافظ خطیب بغددادی l رحمہ اللہ کے قول کو نقل کرنے کے بعد فرماتے ہیں:’’(قلت) قال في الميزان: هذا خبر كذب، والله أعلم‘‘.میں کہتا ہوں کہ ذہبی l رحمہ اللہ نے’’میزان‘‘ میں کہا ہے کہ یہ جھوٹی خبرہے،  واللہ اعلم۔

علامہ ابن عراق l رحمہ اللہ  نے ’’تنزیه الشریعة‘‘[21] میں علامہ سیوطی l رحمہ اللہ  کے قول پر اکتفاء کیا ہے۔