روایت: ’’ إن الدانق من الفضة يؤخذ به يوم القيامة سبعمائة صلاة مقبولة فتعطى إلى الخصم‘‘. چاندی کے ایک دانق کے بدلہ قیامت کے دن سات سو مقبول نمازیں لے کر مد مقابل کو دے دی جائیں گی۔

یہ روایت امام قشیریl رحمہ اللہ نے  ’’شرح أسماء الله الحسنى‘‘[1] میں بلا سند  ’’قیل‘‘ کہہ کر ذکر کی ہے، ملاحظہ ہو:

  ’’وقيل:إن الدانق من الفضة يؤخذ به يوم القيامة سبعمائة صلاة مقبولة فتعطى إلى الخصم‘‘. اور کہا جاتا ہے کہ بے شک چاندی کے ایک دانق کے بدلہ قیامت کے دن سات سو مقبول نمازیں لے کر مد مقابل کو دے دی جائیں گی۔

یہی روایت امام قرطبیl رحمہ اللہ نے  ’’التذكرة‘‘[2]  میں، حافظ ابن ملقنl رحمہ اللہ نے’’التوضيح‘‘[3] میں، علامہ عبدالرحمن صفوریl رحمہ اللہ نے ’’نزهة المجالس‘‘[4]  میں، علامہ قسطلانی l رحمہ اللہ نے  ’’المواهب اللدنية‘‘[5]  میں، علامہ محمد بن احمد میارہ مالکی l رحمہ اللہ نے ’’الدر الثمين‘‘[6] میں اور  علامہ زرقانی l رحمہ اللہ نے  ’’شرح الزرقاني‘‘[7]  میں امام قشیریl رحمہ اللہ کے حوالے سےبغیر سند کے ذکر کی ہے۔

علامہ حصکفیl رحمہ اللہ نے زیر بحث روایت ان الفاظ سے ذکر کی ہے:  ’’جاء أنه يؤخذ لدانق ثواب سبعمائة صلاة بالجماعة‘‘. آیا ہے کہ بےشک ایک دانق کے بدلہ میں سات سوباجماعت  نمازوں کا ثواب لے لیا جائے گا۔

علامہ ابن عابدین شامیl رحمہ اللہ  ’’رد المحتار‘‘[8] میں زیر بحث روایت کے تحت لکھتے ہیں:

 ’’قوله جاء أي: في بعض الكتب أشباه عن البزازية، ولعل المراد بها الكتب السماوية، أو يكون ذلك حديثا نقله العلماء في كتبهم، والدانق بفتح النون وكسرها سدس الدرهم، وهو قيراطان، والقيراط خمس شعيرات، ويجمع على دوانق ودوانيق، كذا في الأختري حموي.

قوله: ثواب سبعمائة صلاة بالجماعة أي: من الفرائض، لأن الجماعة فيها والذي في المواهب عن القشيري: سبعمائة صلاة مقبولة. ولم يقيد بالجماعة، قال شارح المواهب: ما حاصله هذا لا ينافي أن الله تعالى يعفو عن الظالم ويدخله الجنة برحمته، ط ملخصا‘‘.

علامہ ابن عابدینl رحمہ اللہ فرماتے ہیں کہ صاحب درمختار کے قول ’’آیا ہے‘‘سے مراد یہ ہے کہ بعض کتب میں آیا ہے، اشباہ عن بزازیہ [9] ، اور شاید  ’’کتب‘‘سے مراد  ’’کتب سماوی‘‘ ہیں یا یہ کوئی حدیث ہے جسے علماء نے اپنی کتابوں نقل کیا ہے، اور دانق  ـ نون کے زبر اور زیر کے ساتھ ـ درہم کے چھٹے حصے کو کہتے ہیں، اور وہ دو قیراط ہیں، اور ایک قیراط پانچ جَو کے برابر ہوتا ہے، اور دانق کی جمع دوانق اور دوانیق ہے، اسی طرح اختری حموی میں ہے۔

علامہ ابن عابدینl رحمہ اللہ فرماتے ہیں کہ صاحب  ’’در مختار‘‘کے قول  ’’سات سو باجماعت نمازیں‘‘ سے مراد فرض نمازیں ہیں، کیونکہ جماعت تو فرض نماز کی ہوتی ہے، اور ’’مواہب‘‘میں قشیریl رحمہ اللہ سے منقول ہےکہ سات سو مقبول نمازیں لی جائیں گی، قشیریl رحمہ اللہ نے جماعت کی قید ذکر نہیں کی،(نیز) شارح  ’’مواہب ‘‘کے قول کا حاصل یہ ہےکہ یہ روایت اس کے منافی نہیں ہےکہ اللہ تعالی ظالم کو معاف کرکےاسے اپنی رحمت سےجنت میں داخل کردیں،ط،ملخصاً‘‘۔

تلاش بسیار کے باوجودیہ روایت سند اًتاحال ہمیں کہیں نہیں مل سکی، اورجب تک اس کی کوئی معتبر سند نہ ملے اسے آپ ﷺ کے انتساب سے بیان کرنا موقوف رکھا جائے، کیونکہ آپﷺ کی جانب صرف ایساکلام اور واقعہ ہی منسوب کیا جاسکتا ہے جومعتبر سند سے ثابت ہو۔