روایت: ۱-’’میرےآسمان اور زمین مجھے نہیں سما سکے،البتہ میرے مومن بندے کا دل، مجھے اپنے میں سما لیتا ہے‘‘۔ ۲-’’دل رب کا گھر ہے‘‘۔

ہمارے معاشرے میں اسرائیلی روایات (بنی اسرائیل سے منقول روایات)  کا ایک بڑا ذخیرہ زبان زَد عام ہے،جن کے بارے میں دو امور اصولی طور پر انتہائی اہمیت کے حامل ہیں:

۱-اسرائیلی روایات کو ہماری شریعت کی روشنی میں پرکھا جائے گا،ان میں صرف وہ روایات قابلِ بیان ہوں گی،جو ہماری شریعت کے موافق ہوں یا کم از کم وہ روایات، شریعتِ محمدیہ ﷺ کے خلاف نہ ہوں؛ لہذا اگر کوئی اسرائیلی روایت، ہماری شریعت کے مضامین کے خلاف ہوگی،تواسے بیان کرنے سے احتراز کیا جائے گا، اس اصولی قاعدے کوحافظ ابن کثیرl نے ان الفاظ میں بیان کیا ہے:

’’فإنَّهاعلى  ثلاثة أقسام:

أحدهما ماعَلِمْنَا صِحَّتَة مِمَّا بأیدِینَا مِمَّایَشْهَدُ له بِالصِّدْقِ، فذاک صحیحٌ .

الثانی: مَاعَلِمْنَا کِذْبَه بِمَا عندَنا مِمَّا یُخَالِفُه .

والثالث: ماهو مَسْکُوتٌ عنه، لامِنْ هذا القَبِیلِ ولا مِنْ هذا القَبِیلِ، فلا نُؤمِنُ به ولا نُکّذِّبُه، وتَجُوزُ حِکَایَتُه لِمَا تَقَدَّمَ‘‘[1].

’’اسرائیلیات کی تین قسمیں ہیں:

پہلی قسم ان اسرائیلیات کی ہے،جن کی صحت ہمیں معلوم ہے،کیونکہ ہمارے پاس موجودہ نصوص ان کے حق میں صداقت اور سچائی کی شہادت دیتے ہیں۔

دوسری قسم وہ اسرائیلیات ہیں، جن کا جھوٹ ہونا ہمیں معلوم ہو،بایں صورت کہ ہمارے پاس موجودہ نصوص ان کی مخالفت کرنے والے ہیں۔

تیسری قسم وہ اسرائیلیات ہیں، جن کے بارے میں سکوت ہے،ان کا تعلق نہ پہلی قسم سے ہے،نہ دوسری قسم سے ہے،ہم ان پر نہ ایمان لاتے ہیں اور نہ ہی تکذیب کرتے ہیں،سابقہ تفصیل کی بنا پر ان اسرائیلیات کو بیان کرنا جائز ہے۔‘‘

۲-اسرائیلیات کے حوالے سے دوسری اہم بات یہ ہے کہ ان اسرائیلی روایتوں کو بعض اوقات آنحضر ت ﷺ کی جانب منسوب کر دیا جاتا ہے، حالانکہ آپ ﷺ کی جانب صرف وہی روایت منسوب کی جا سکتی ہے،جو کسی معتبر سند سے ثابت ہو؛ اس لیے روایات کو اس قسم کے اختلاط سے محفوظ رکھنا انتہائی اہم ہے،ذیل میں اسی فریضے کے پیشِ نظر دو ایسی اسرائیلی روایتیں ذکر کی جائیں گی، جن کے بارے میں ائمہ حدیث نے یہ صراحت بھی کی ہے کہ یہ روایتیں آپ ﷺ سے ثابت نہیں ہے، اس کا مقتضی یہ تھا کہ ان روایتوں کو آپ ﷺ کی جانب منسوب کیے بغیر بیان کیا جاتا، لیکن عام طور پر انہیں آپ ﷺ کی طرف منسوب کر دیا جاتا ہے، اس لیے ان روایتوں کو مرفوعاً (یعنی آپ ﷺ کے انتساب سے) بیان کرنا جائزنہیں ہے، بلکہ انہیں صرف اسرائیلی روایت کہہ کر بیان کرنا چاہیے۔