روایت: ’’آپ ﷺ کا دریا کے کنارے پر عصر کی نماز کے بعد اپنی امت کےلئے رو رو کر مغفرت کی دعا مانگنا، اور ایک چڑیا کا اپنی چونچ میں چند دانے ریت کے لے جا کر دریا میں ڈالنا، پھر آپ ﷺ کے پوچھنے پر جبرائیل علیہ السلام کا آپ ﷺ کو بتانا کہ جس طرح چڑیا کے ریت کے چند دانوں سے دریا میں کوئی فرق نہیں پڑتا، اسی طرح آپ ﷺ کی امت کے گناہ اللہ تعالی کی رحمت کے دریا کے سامنے کوئی حیثیت نہیں رکھتے‘‘۔
تحقیق کی تفصیل
روایت: ’’ایک مرتبہ نبی علیہ السلام لشکر کے ساتھ واپس تشریف لارہے تھے، دریا کے کنارے آپﷺ نے پڑاؤ ڈالا، عصر کی نماز ادا کی، عصر کی نماز کے بعد اللہ تعالی کے پیارے حبیب ﷺ نے رو رو کر امت کی مغفرت کے لئے دعا مانگی، اے اللہ! میری امت کو بخش دیجیے، ان کی خطائیں معاف کر دیجیے، آپﷺ نے دیکھا کہ ایک چھوٹی سی چڑیا آئی اور اس نے ریت کے چند دانے اپنے منہ میں ڈالے، اور دریا کے پانی کی طرف اڑ کر چلی گئی، پھر دوبارہ آئی، پھر چند دانے ریت کے چونچ میں ڈالے پھر دریا کی طرف چلی گئی، جب اس نے دو چار دفعہ ایسا کیا تو اللہ کے پیارے حبیبﷺ متوجہ ہوئےکہ یہ چڑیا کر کیا رہی ہے؟اتنے میں جبرئیل علیہ السلام آئے نبیﷺ نے فرمایا کہ جبرئیل یہ کیا معاملہ ہے؟ جبرائیل علیہ السلام نے کہا: اے اللہ کے نبیﷺ!اس سارے معاملے کو اللہ نے مجسم کرکے دکھایا۔
آپﷺ نے رو رو کر دعا مانگی، اللہ میری امت کے گناہوں کو معاف فرما دیجیے، رب کریم نے آپ کو مجسم شکل میں یہ بات دکھا دی کہ دیکھئے جس طرح اس چڑیا کی چونچ میں ایک دو دانے ہی تو ریت کے آتے ہیں اور یہ ان دانوں کو لے جاکر دریا میں جب ڈالتی ہے تو دریا کو ریت کے ان دانوں کا پتہ ہی نہیں چلتا، اے میرے حبیبﷺ! آپ کی امت کے گناہ ریت کے ان دانوں کی طرح ہیں اور میری رحمت تو اس دریا کے مانند ہے، جس طرح ریت کے دانے دریا کے سامنے کوئی حیثیت نہیں رکھتے، اسی طرح آپ کی امت کے گناہ میری رحمت کے دریا کے سامنے کوئی حیثیت نہیں رکھتے، میں قیامت کے دن آپ کو خوش کردوں گا‘‘۔
تلاش بسیار کے باوجودیہ روایت سند اً تاحال ہمیں کہیں نہیں مل سکی، اور جب تک اس کی کوئی معتبر سند نہ ملے اسے آپ ﷺکے انتساب سے بیان کرنا موقوف رکھا جائے، کیونکہ آپﷺ کی جانب صرف ایساکلام اورواقعہ ہی منسوب کیا جاسکتا ہے جومعتبر سند سے ثابت ہو، واللہ اعلم۔
اس مضمون پر مشتمل ایک روایت امام مسلم رحمہ اللہ نے اپنی ’’صحیح‘‘[1] میں تخریج کی ہے، ملاحظہ ہو:
’’حدثني يونس بن عبد الأعلى الصدفي، أخبرنا ابن وهب، قال: أخبرني عمرو بن الحارث، أن بكر بن سوادة، حدثه عن عبد الرحمن بن جبير، عن عبد الله بن عمرو بن العاص، أن النبي صلى الله عليه وسلم تلا قول الله عز وجل في إبراهيم: ’’رب إنهن أضللن كثيرا من الناس فمن تبعني فإنه مني‘‘ الآية، وقال عيسى عليه السلام: ’’إن تعذبهم فإنهم عبادك وإن تغفر لهم فإنك أنت العزيز الحكيم‘‘، فرفع يديه وقال: اللهم أمتي أمتي، وبكى، فقال الله عز وجل: يا جبريل! اذهب إلى محمد، وربك أعلم، فسله ما يبكيك؟ فأتاه جبريل عليه الصلاة والسلام فسأله، فأخبره رسول الله صلى الله عليه وسلم بما قال، وهو أعلم، فقال الله: يا جبريل! اذهب إلى محمد فقل: إنا سنرضيك في أمتك، ولا نسوءك‘‘.
حضرت عبد اللہ بن عمرو بن عاص رضی اللہ عنہما سے روایت ہے کہ نبیﷺ نے ابراہیم علیہ السلام کے بارے میں اللہ تعالی کے قول کی تلاوت فرمائی: اے ’’میرے پروردگار ان بتوں نے میرے بہترین آدمیوں کو گمراہ کردیا، پھر جو شخص میری راہ چلے گا وہ تو میرا ہے ہی‘‘، اور عیسی علیہ السلام کے بارے میں(اللہ تعالی کے اس قول کی تلاوت فرمائی):’’اگر آپ ان کو سزا دیں تو یہ آپ کے بندے ہیں، اور اگر آپ ان کو معاف فرمادیں تو آپ زبردست ہیں حکمت والے ہیں‘‘، اس کے بعد اپنے دونوں ہاتھ اٹھائے اور فرمایا: اے اللہ! میری امت میری امت، اور سسکیاں لی تو اللہ تعالی نے ارشاد فرمایا: اے جبریل! محمد کے پاس جاؤ، حالانکہ آپ کا رب خوب جانتا ہے، اور پوچھو کہ آپ کو کیا چیز رلا رہی ہے، جبریل علیہ السلام آپﷺ کے پاس آئے اور ان سے دریافت کیا تو رسول اللہﷺنے جو کہا تھا ان کو بتا دیا،حالانکہ اللہ تعالی خوب جانتے ہیں، تو اللہ تعالی نے فرمایا: اے جبریل!محمد کے پاس جاکر کہو کہ ہم آپ کو آپ کی امت کے بارے میں خوش کردیں گے، اور غمگین نہیں کریں گے۔
حوالہ جات
[1] صحيح مسلم:1/191،رقم:346،ت:محمد فواد عبد الباقي،دار الكتب العلمية ـ بيروت،الطبعة الأولى 1412هـ .