روایت: آپﷺ کا ارشاد ہے کہ ’’میری امت کے علما ء بنی اسرائیل کے انبیاء کی طرح ہیں‘‘۔

ہمارے گرد وپیش ایسی بہت سی حدیثیں زبان زَد عام ہیں،جو اگر چہ صحیح معنی پر مشتمل ہوتی ہیں،لیکن خاص ان الفاظ کے ساتھ وہ حدیثیں ثابت نہیں ہوتیں، چنانچہ محدثین کرام l ان حدیثوں کو صاف لفظوں میں بےاصل قراردیتے ہیں، کیونکہ مسلمہ قاعدہ ہے کہ کسی بھی کلام اور کلمات کو رسول اللہ ﷺ کی جانب ایک خاص اصل اور قاعدے سے منسوب کیا جاسکتا ہے،جسے ’’اسناد‘‘ کہا جاتا ہے، اس اسناد میں موجود راویوں کے حالات، ان کے مابین اتصال ا ور انقطاع وغیرہ امور کو دیکھ کر حفاظ حدیث ہر حدیث کو اس کا فنی مقام دیتے ہیں، اسی چھان بین میں بعض حدیثوں کے بارے میں وہ بے اصل ہونے کا فیصلہ کرتے ہیں،لہذا ایسی حدیثوں کو بیان کرنا جائز نہیں ہوتا،البتہ یہ عین ممکن ہے کہ اس بے اصل روایت کا مضمون دوسری معتبر حدیثوں سے ثابت ہو،لیکن اس سے یہ لازم نہیں آتا کہ ہم ان معتبر روایتوں کی وجہ سے اُن کے مضمون پر مشتمل بے اصل حدیثوں کو ثابت سمجھ کر انھیں بیان کریں،اور رسول اللہ ﷺ کی طرف اُن کا انتساب کریں،اس کی وجہ ما قبل میں بیا ن کی جاچکی ہے کہ ثبوتِ حدیث کے اپنے مسلمہ اُصول اور ضروریات ہیں، یہ بے اصل حدیثیں اُن سے خالی ہونے کی بنا پر درجۂ اعتبار سے ساقط اور نا قابلِ بیان ہوتی ہیں، اور انہی کے مضمون پر مشتمل دیگر روایات ان قواعد پر پورا اترنے کی وجہ سے مقبول بن جاتی ہیں، سابقہ بیان کردہ اُصول کو خاتم المحدثین علامہ عبد العزیز فرہاروی lنے ’’ کوثر النبي‘‘[1]میں ان لفظوں سے لکھا ہے:

’’وکثیراً مایکون الحدیثُ الموضوعُ مُشْتَمِلاً علی معنی صحیح، فإذا سَمِعَتْ العامةُ مِنَ المُحَدِّثِ أنّه موضوعٌ، ذَهَبَ وهمُهم إلی أنّه یُرِیدُ إبطالَ معناه، وهذه جَهَالَةٌ شَدِیدَةٌ مَرْکُوْزَةٌ في طِبَاعِهم ... وبالجملة أهلُ الحدیث إنّمایُنْکِرُ صُدُورَ اللَّفْظِ عن النبيّ صلى الله عليه وسلم‘‘.

’’اکثر ایسا ہوتا ہے کہ ایک من گھڑت حدیث، صحیح معنی پر مشتمل ہوتی ہے، پس جب ایک عامی شخص کسی محدث سے یہ سن لے کہ یہ حدیث من گھڑت ہے، تو اسے یہ وہم ہونے لگتا ہے کہ یہ محدث تو اس حدیث کے معنی اور مضمون کو باطل قرار دے رہا ہے،بس یہی شدید جہالت ان کی فطرتوں میں اتری ہوئی ہے… خلاصۂ  کلام یہ ہے کہ محدث تو صرف اس بات کا انکار کرتا ہے کہ یہ الفاظ رسول اللہ ﷺ سے ثابت نہیں ہیں‘‘ (ہاں! یہ ممکن ہے کہ اس کا معنی کسی دوسری روایت سے ثابت ہو)۔

اسی فریضے کے پیش ِ نظر، ذیل میں ایک ایسی روایت بیان کی جائے گی جو محدثین کے نزدیک بے اصل ہے، اس لئے اسے بیان کرنا درست نہیں ہے، البتہ اس کے معنی پر مشتمل دیگر معتبر حدیثیں اس بے اصل روایت سے مستغنی کرنے والی ہیں، لہذا صرف ان مقبول حدیثوں کو بیان کرنا چاہیے۔