روایت: ’’جو شخص ’’لا إله إلّا اﷲ‘‘ کہے اور اسے کھینچ کر پڑھے (یعنی لمبا کرے) تو اس شخص کے چار ہزار گناہ کبیرہ ختم (یعنی معاف)ہوجاتے ہیں‘‘۔

محدثینِ کرام ہر زمانے میں احادیث کو خس وخاشاک سے صاف کرتے رہے ہیں، ظاہر ہے ان کی یہ کاوشیں ساری امت پر احسان ہیں، کیوں کہ ان محدثینِ عظام نے لوگوں کے سامنے شریعت کوصاف اور نکھرے انداز میں پیش کر دیا ہے،لیکن ہمارے اس دور کا اَلمیہ یہ ہے کہ جب ایک عامی شخص کے سامنے کسی زبان زَد عام من گھڑت حدیث کا اظہار کیا جاتا ہے تو اسے یہ وہم ہونے لگتا ہے اس معنی اور مضمون کی بہت سی حدیثیں ثابت ہیں؛ لہذا اسے بیان کرنے میں بھی حرج نہیں ہونا چاہیے،گویا کہ وہ یہ سمجھتا ہے کہ ہر نیکی کو آپ ﷺ کی جانب منسوب کیا جا سکتا ہے،اسی طرح ہر برائی کی نفی کا انتساب آپ ﷺ کی طرف کر سکتے ہیں،اور بلاشبہ آپ ﷺ خیر کو پھیلانے اور شر کو ختم کرنے والے ہیں،لیکن بہرحال آپ ﷺ کی طرف صرف ایسا قول ہی منسوب ہوسکتا ہے،جو معتبر سند سے ثابت ہو،بلکہ آپ ﷺ کی جانب جھوٹی خبر منسوب کرنے پر سخت وعید ہے، چنانچہ ’’الجامع الصحیح للبخاري‘‘ میں ہے: ’’مَنْ کَذَبَ علَيّ مُتَعَمّداً فلْیَتَبَوّأ مَقْعَدَه مِن النّار‘‘[1]. ’’آپ ﷺ کا ارشاد ہے: جو شخص مجھ پر جھوٹ بولے،وہ اپنا ٹھکانہ جہنم میں بنالے‘‘۔

خاتم المحدثین امام عبد العزیز فرہاروی lنے ’’کوثر النَّبِیّ وزُلَالُ حَوْضِه الرَّوِيّ‘‘[2] میں عوام کے انہیں سطحی وساوس کو ان لفظوں میں بیان کیا ہے:

’’کثیراً ما یَضَعُ الکَذّابون تَرْغِیْباً في طاعةٍ،ونَهْیاً عن مَعصِیَةٍ، فیَطْعَنُ المُحَدِّثُ في حدیثِهم، فیَظُنُّ العَامَّة أنّ هذا إنکارٌ للطَّاعة والمَعْصِیَة، فإذا قُلنا: صلاة الأسابیع موضوعةٌ، وحدیث:’’مَنْ شَرِبَ البَنْجَ فعلیه کذا‘‘. موضوعٌ، قال السامِعُ: أفتی فلانٌ بأنّه لا ثَوابَ للصلاة النَّافلة وأنّ البَنْجَ مباحٌ‘‘.

جھوٹے راوی اکثر نیکی میں رغبت دلانے اور برائی سے روکنے کےلیے حدیثیں گھڑ لیتے ہیں،پھر جب محدث اُن کی حدیثوں میں حرف گیری کرتا ہے تو لوگ یہ سمجھتے ہیں کہ یہ تو نیکی اور بدی کا انکار ہے، چنانچہ جب ہم نے لوگوں سے کہا کہ ’’صلاۃ الأسابیع‘‘ (یعنی خاص نوافل،جن کا شرعاً کوئی ثبوت نہیں ہے) من گھڑت ہے اور حدیث:’’جو بھنگ پئے گا اس کو اتنا اتنا گناہ ہوگا‘‘، یہ بھی موضوع ہے،اس پر ایک سننے والا کہنے لگا کہ فلاں نے فتوی دیا ہے کہ نفل نمازوں پر کوئی ثواب نہیں ملتا اور بھنگ پینا بلا شبہ جائز ہے۔

بہر حال عوامی حلقوں میں اس اہم فریضے کو خوب رائج کرنے کی ضرورت ہے کہ آپﷺ کی جانب کسی بات کو منسوب کر نے میں خوب احتیاط سے کام لینا چاہیے، اور من گھڑت،باطل حدیثوں سے سختی سے اجتناب کرنا چاہیے۔

اسی مقصود کے پیشِ نظر، ذیل میں ایک ایسی ہی روایت بیان کی جائے گی جو باطل ہونے کے باوجود زبان زَد عام ہے۔

روایت پر ائمہ حدیث کا کلام: