روایت: ’’آپ ﷺ نے فرمایا: رجب کے پہلے دن کا روزہ تین سال کا کفارہ ہے، دوسرے دن کا روزہ دو سال کا کفارہ ہے، تیسرے دن کا روزہ ایک سال کا کفارہ ہے، پھر ہر دن کا روزہ ایک ماہ کا کفارہ ہے‘‘۔

زیر بحث روایت حافظ ابو محمد حسن بن محمد خلال l رحمہ اللہ نے ’’فضائل شهر رجب‘‘[1] میں تخریج کی ہے:

’’حدثنا عبد الله بن أحمد بن عبد الله التمار، ثنا محمد بن عبد الله الطلالاينوسي [ كذا في الأصل، والصحيح: محمد بن عبد الله الأبنوسي[2]] أبو بكر الصيدلاني [ كذا في الأصل، والصحيح: حدثنا أبو بكر الصيدلاني، كذا في الأمالي]، ثنا أبو جعفر محمد بن أبي سليم المقرئ، ثنا محمد بن بشر، ثنا أبو عبد الله العقيلاني، عن حمران بن أبان مولى عثمان، عن عكرمة، عن ابن عباس رضي الله عنهما قال: قال رسول الله صلى الله عليه وسلم: يوم من رجب كفارة ثلاث سنين، والثاني كفارة سنتين، والثالث كفارة سنة، ثم كل يوم شهر‘‘.

حضرت ابن عباس q رضی اللہ عنہما فرماتے ہیں کہ رسول اللہ ﷺ نے ارشاد فرمایا: رجب کے پہلے دن کا روزہ تین سال کا کفارہ ہے، اور دوسرے دن کا روزہ دو سال کا کفارہ ہے، اور تیسرے دن کا روزہ ایک سال کا کفارہ ہے، پھر ہر دن کا روزہ ایک مہینہ  کا کفارہ ہے۔

یہی روایت علامہ مرتضی زبیدی l رحمہ اللہ نے ’’الأمالي‘‘[3] میں حافظ ابن خلال l رحمہ اللہ کے طریق سے تخریج کی ہے۔

علامہ مرتضی زبیدی l رحمہ اللہ کی نقل کردہ سند میں فرق بھی ہے[4]۔

قطع نظر خاص زیر بحث روایت کے حافظ ابن تیمیہ l رحمہ اللہ ’’مجموع فتاوى‘‘[5] میں فرماتے ہیں:

’’وأما صوم رجب بخصوصه، فأحاديثه كلها ضعيفة، بل موضوعة، لا يعتمد أهل العلم على شيء منها، وليست من الضعيف الذي يروى في الفضائل، بل عامتها من الموضوعات، المكذوبات‘‘.

اور بہرحال خصوصیت کے ساتھ رجب کے روزے رکھنا، اس کی تمام احادیث ضعیف ہیں، بلکہ من گھڑت ہیں، اہل علم ان میں سے کسی چیز پر اعتماد نہیں کرتے، اور یہ احادیث ایسی ضعیف بھی نہیں ہیں جن کو فضائل میں بیان کیا جاسکتا ہو، بلکہ ان میں اکثر روایات من گھڑت، جھوٹی ہیں۔

حافظ ابن رجب حنبلی l رحمہ اللہ قطع نظر خاص زیر بحث روایت کے’’لطائف المعارف‘‘[7] میں فرماتے ہیں:

’’وأما الصيام: فلم يصح في فضل صوم رجب بخصوصه شيء عن النبي صلى الله عليه وسلم، ولا عن أصحابه، ولكن روي عن أبي قلابة، قال: في الجنة قصر لصوام رجب، قال البيهقي: أبو قلابة من كبار التابعين، لا يقول مثله إلا عن بلاغ‘‘.

اور بہر حال روزے رکھنا: رجب کے روزہ کی فضیلت کے بارے میں اس کی خصوصیت کے ساتھ کوئی چیز نبی ﷺ سے صحیح نہیں ہے، اور نہ آپ ﷺ کے صحابہ p رضی اللہ عنہم سے،  لیکن ابو قلابہ سے روایت کیا گیا ہے، وہ فرماتے ہیں: جنت میں رجب کے روزے رکھنے والوں کےلئے محل ہے، بیہقی l رحمہ اللہ فرماتے ہیں: ابو قلابہ کبار تابعین میں سے ہیں، وہ اس جیسی بات نہیں کہہ سکتے مگر یہ کہ ان تک پہنچی ہو۔

ابو قلابہ کی مذکورہ روایت سے فی الحال یہاں تعرض نہیں کیا جارہا۔

علامہ فیروزآبادی l رحمہ اللہ اپنے ’’رسالة‘‘[8] میں ’’باب صیام رجب وفضلہ‘‘ کا عنوان قائم کرکے فرماتے ہیں:

’’لم يثبت فيه شيء، بل قد ورد كراهة ذلك‘‘. رجب کے روزے کے بارے میں کوئی چیز ثابت نہیں ہے، بلکہ اس کی کراہت وارد ہوئی ہے۔

علامہ مناوی l رحمہ اللہ ’’فيض القدير‘‘[9] میں زیر بحث روایت کے بارے میں فرماتے ہیں:

’’حديث ضعيف جدا، قال ابن الصلاح وغيره: لم يثبت في صوم رجب نهي ولا ندب، وأصل الصوم مندوب في رجب وغيره، وقال ابن رجب: لم يصح في فضل صوم رجب بخصوصه شيء عن النبي صلى الله عليه وسلم، ولا عن أصحابه‘‘.

یہ حدیث شدید ضعیف ہے، ابن صلاح l رحمہ اللہ   وغیرہ فرماتے ہیں: رجب کے روزوں کے بارے میں نہ نہی ثابت ہے اور نہ ہی ندب، اور روزے کی اصل رجب اور غیر رجب میں مندوب ہے، اور ابن رجب حنبلی l رحمہ اللہ   فرماتے ہیں: خصوصیت کے ساتھ رجب کے روزہ کی فضیلت کے بارے میں کوئی چیز نبی ﷺ سے صحیح نہیں ہے، اور نہ آپ ﷺ کے صحابہ p رضی اللہ عنہم سے۔

نیز علامہ مناوی l رحمہ اللہ ’’التيسير‘‘[10] میں زیر بحث روایت ذکر کرکے فرماتے ہیں: ’’وإسناده ساقط‘‘. اور اس کی اسناد ساقط ہے۔

علامہ شوکانی l رحمہ اللہ ’’الفتح الرباني‘‘[11] میں زیر بحث روایت اور رجب کے روزوں کےمتعلق چند دیگر روایات ذکرکرنے کے بعد فرماتے ہیں:

’’هذا جملة ما ورد في صيام رجب مما يختص به، وكلها أحاديث باطلة، لا أصل لها، وقد ذكرنا أكثرها في الفوائد المجموعة في الأحاديث الموضوعة، وحكى ابن السبكي عن محمد بن نصر السمعاني، أنه قال: لم يرد صوم شهر رجب على الخصوص سنة ثابتة، والأحاديث التي تروى فيه واهية، لا يفرح بها عالم، انتهى‘‘.

یہ وہ تمام احادیث ہیں جو خصوصیت سے رجب کے روزوں کے متعلق وارد ہوئی ہیں، اور یہ تمام احادیث باطل ہیں، ان کی کوئی اصل نہیں ہے، اور ہم ان میں سے اکثر ’’فوائد مجموعہ فی الاحادیث الموضوعہ‘‘میں ذکر کرچکے ہیں، اور ابن سبکی l رحمہ اللہ   نے محمد بن نصر سمعانی l رحمہ اللہ سے نقل کیا ہے، وہ فرماتے ہیں: رجب کے مہینہ کے روزے کے بارے میں خصوصی طور پر کوئی ثابت سنت وارد نہیں ہوئی، اور جو احادیث اس بارے میں روایت کی گئی ہیں وہ واہی ہیں، کوئی عالم ان پر خوش نہ ہو، انتہی۔

تلاش بسیار کے باوجود زیر بحث روایت کی سند میں موجود راوی ابو بکر صیدلانی، ابو جعفر محمد بن ابی سلیم مقری اور ابو عبد اللہ عُقَیلْانی کے تراجم ہمیں کتب رجال میں نہیں مل سکے، نیز محمد بن بشر کی بھی تعیین نہیں ہوسکی۔