روایت: بچے کی بسم اﷲ پر، اس بچے کی، اس کے والدین کی اور اس کے اُستاد کی بخشش۔

اعداءِ دین، چراغِ اسلام بجھانے کےلئے، سر توڑ کوشش کرتے رہے ہیں، لیکن وہ ان مذموم مقاصد میں ہمیشہ، بری طرح ناکام رہے ہیں، کیونکہ قرآن کے اعلان کے مطابق یہ چراغ تا قیامت نور پھیلاتا رہے گا ’’یُرِیدُونَ لِیُطْفِئُوا نُورَ اﷲِ بِأفْوَاهِهِمْ وَاللهُ مُتِمُّ نُوره وَلَو کَرِهَ الکَافِرُونَ‘‘[1] ترجمہ: ’’یہ لوگ چاہتے ہیں کہ اپنے منہ سے اللہ کے نور کو بجھا دیں، حالانکہ اللہ اپنے نور کی تکمیل کر کے رہے گا، چاہے کافروں کو یہ بات کتنی بُری لگے‘‘۔

وضعِ حدیث،دشمنانِ اسلام کاخطرناک ہتھیار رہا ہے، جس کے ذریعے زنادقہ شریعت کومسخ کرنے کی کوشش کرتے ہیں،چنانچہ جعفر بن سلیمانl  ، مہدیl سے نقل کرتے ہیں: ’’أقَرّ عندي رَجُلٌ مِنَ الزَّنَادِقَةِ أنّه وَضَعَ أربعمائة حدیث تَجَولُ في أیدي الناس‘‘[2].ایک زندیق نے میرے سامنے اقرار کیا کہ اس نے چار سو ایسی روایتیں گھڑی ہیں،جو لوگوں کے درمیان گردش کر رہی ہیں۔

یہ صرف اسلام ہی کی شان ہے کہ وہ نہ صرف ان تمام تباہ کن فتنوں سے محفوظ رہا ہے، بلکہ اس نے ان من گھڑت روایتوں اور وضّاعین کی شناخت کو تاریخ کا حصّہ بنا دیا، آج آپ کسی بھی راوی کا نام لے کر، کتب الرجال، اصولِ حدیث اور اعلامِ امت کی رہنمائی سے، اس کا متعین فنّی مقام جان سکتے ہیں۔

ذیل میں احمد بن عبداﷲ بن خالد الجُوَیْبَاری کی ایک ایسی ہی روایت پیش کی جائے گی، جو پاک وہند میں زبان زَد عام ہے، حالانکہ حافظ ذَہَبِی l فرماتے ہیں: ’’الجُوَیْبَارِي مِمَّنْ یُضْرَبُ له بِالْکِذْبِ‘‘ جویباری کا شمار ان لوگوں میں ہے، جن کا جھوٹ ضرب المثل ہے۔