ابو محمد عبد اللہ بن محمد بن وہب بن بشر بن صالح دِیْنَوَرِی

واضح رہے کہ ان کا نام کبھی عبد اللہ بن وہب اور کبھی عبد اللہ بن حمدان بن وہب بھی آتا ہے[5]، اور حمدان کا نام محمد ہے[6]۔

حافظ ابن عدی l ’’الكامل‘‘[7] میں فرماتے ہیں: ’’سمعت عمر بن سهيل [ كذا في الأصل، والصحيح: سهل] يعرف بابن كدو الدينوري: يرميه بالكذب ويصرح به‘‘. میں نے عمر بن سہل جو کہ ابن کدو[8] دینوری سے معروف تھے سے سنا: وہ عبد اللہ بن حمدان کو جھوٹ میں متہم قرار دیتے تھے، اور صاف لفظوں میں یہ بات فرماتے تھے۔

حافظ عمر بن سہل بن اسماعیل المعروف کدو l فرماتے ہیں: ’’سمعت ابن وهب يقول: لقنت أبا عمير بن النحاس بحمص (أربعين حديثا)، فلما بلغت (إحدى وأربعين) قال لي: أما تستحي أتجشمني أن أشهد على رسول الله صلى الله عليه وسلم في مجلس واحد أكثر من أربعين شهادة‘‘[9].میں نے ابن وہب کو یہ کہتے ہوئے سنا کہ میں نے ابو عمیر بن نحاس کو حمص میں چالیس حدیثوں کی تلقین کی، جب میں اکتالیسویں حدیث پر پہنچا تو انہوں نے کہا: تمہیں اس سے حیا نہیں آتی کہ ایک ہی مجلس میں رسول اللہ ﷺ کے خلاف چالیس سے زائد گواہیاں دینے کا بوجھ مجھ پر لاد رہے ہو؟

حافظ خطیب بغدادی l ’’تاريخ بغداد‘‘[10] میں ابو عبد اللہ محمد بن ابراہیم بن زیاد طیالسی کے ترجمہ میں عبد اللہ بن محمد بن وہب کے بارے میں لکھتے ہیں: ’’ قال صالح: وسمعت أبا جعفر يقول: توهمت أن الناس لا يحملون حديثه لضعفه‘‘. صالح (یعنی حافظ صالح بن احمد l) کہتے ہیں: میں نے ابو جعفر l کو کہتے ہوئے سنا ، وہ فرما رہے تھے: میرا گمان ہے کہ لوگ عبد اللہ بن محمد بن وہب کے ضعف کی وجہ سے اس سے تحملِ حدیث نہیں کرتے تھے۔

امام ابو عبد اللہ حاکم نیشاپوری l فرماتے ہیں: ’’سمعت أبا عبد الله الزبير بن عبد الواحد الحافظ بأسَداباذ يقول: ما رأيت لأبي علي زلة قط إلا روايته عن عبد الله بن وهب الدينوري وأحمد بن عمير بن جوصا‘‘[11]. میں نے ابو عبد اللہ زبیر بن عبد الواحد کو اَسَداباذ میں فرماتے ہوئے سنا: وہ فرما رہے تھے کہ میں نے ابو علی کی عبد اللہ بن وہب دِیْنَوَری اور احمد بن عمیر جَوْصَا سے روایت کرنے کے علاوہ کوئی لغزش نہیں دیکھی۔

امام ابو عبد اللہ حاکم l فرماتے ہیں: ’’سألت أبا علي الحافظ عن عبد الله بن محمد بن وهب الدينوري، فقال: كان صاحب حديث، حافظا، ثم قال أبو علي: بلغني أن أبا زرعة كان يعجز عن مذاكرته في زمانه‘‘[12]. میں نے حافظ ابو علی l سے عبد اللہ بن محمد بن وہب دِیْنَوَرِی کے بارے میں پوچھا، آپ نے فرمایا: وہ صاحبِ حدیث حافظ تھا، پھر ابو علی l نے کہا: مجھے یہ بات پہنچی ہے کہ ابو زرعہ l اپنے زمانے میں عبد اللہ بن محمد دِیْنَوَری کے ساتھ مذاکرہ کرنے سے عاجز ہوجاتے تھے۔

حافظ ابن عدی l ’’الکامل‘‘[13]میں فرماتے ہیں:  ’’ كان يعرف ويحفظ‘‘. یہ صاحبِ معرفت وحفظ تھے۔

اس کے بعد حافظ ابن عدی l دیگر ائمہ کے اقوال نقل کرکے فرماتے ہیں: ’’وعبد الله بن حمدان قد قبله قوم وصدقوه، والله أعلم‘‘. اور عبد اللہ بن حمدان کو ایک جماعت نے قبول کیا ہے، اور ان کی تصدیق کی ہے۔

حافظ دار قطنی l فرماتے ہیں: ’’يضع الحديث‘‘[14]. وہ حدیث گھڑتا ہے۔

نیز حافظ دار قطنیl ’’الضعفاء والمتروكون‘‘[15] میں فرماتے ہیں:  ’’حدثونا عنه، [متروك]‘‘. محدثین نے ہمیں ان سے حدیث بیان کی ہے، یہ متروک ہے۔

حافظ ابن جوزی l نے ’’الضعفاء والمتروکین‘‘[16] میں حافظ ابن عدی l اور حافظ دار قطنی l کے کلام پر اکتفاء کیا ہے۔

حافظ خلیلی l ’’ الإرشاد‘‘[17] میں فرماتے ہیں:  ’’حافظ، مشهور، ارتحل إلى العراقين، وإلى الجبل، والري، وإلى الشام، ومصر، لكنه يخالف في بعض ما يرويه‘‘. حافظ ہے، مشہور ہے، اس نے عراقَیْن، جبل، ری، شام، مصر کی جانب اسفار کئے ہیں، لیکن اس کی بعض مرویات میں ان کی مخالفت کی گئی ہے۔

حافظ مزی l نے ’’تهذيب الكمال‘‘[18] میں احمد بن سعید بن بشر کے ترجمہ میں عبد اللہ بن محمد بن وہب دینوری کو ’’أحد الضعفاء‘‘ کہا ہے۔

حافظ ذہبی l  ’’سير أعلام النبلاء‘‘[19] میں فرماتےہیں:  ’’وما عرفت له متنا يتهم به، فأذكره، أما في تركيب الإسناد، فلعله‘‘. میں ایسا کوئی متن نہیں پہچانتا جس کی وجہ سے اس کو متہم قرار دوں، اور اس متن کو ذکر کروں، البتہ یہ سند جوڑنے والوں میں ہوسکتا ہے۔

نیز حافظ ذہبی l  ’’ديوان الضعفاء‘‘[20] اور ’’ المغني في الضعفاء‘‘[21] میں لکھتے ہیں:  ’’قال الدارقطني: متروك‘‘. دار قطنی l نے اسے متروک کہا ہے۔

نیز حافظ ذہبی l نے ’’ميزان الاعتدال‘‘[22] میں عبد اللہ بن محمد بن وہب کو ’’متہم‘‘ قرار دیا ہے۔

علامہ سبط  ابن عجمی l نے’’الكشف الحثيث‘‘[23] میں حافظ دار قطنی lکے کلام پر اکتفاء کیا ہے۔

علامہ ابن عراق l نے  ’’تنزيه الشريعة‘‘[24] میں عبد اللہ بن محمد بن وہب دینوری کو وضاعین ومتہمین کی فہرست میں شمار کرکے حافظ ابن عدی l اور حافظ دار قطنی l کے کلام پر اکتفاء کیا ہے۔