ابو عبد اللہ ابو سلیمان سَلام بن سَلم ویقال ابن سُلیم تمیمی مدائنی سعدی المعروف بالطویل

حافظ یحیی بن معین l ، سلام طویل کے بارے میں فرماتے ہیں: ’’ضعيف، لا يكتب حديثه‘‘[49].ضعیف ہے، اس کی حدیث نہیں لکھی جائے گی۔

حافظ یحیی بن معین l نے ایک مقام پر سلام کو ’’ليس بشيء‘‘کہا ہے[50]۔

حافظ یحیی بن معین l ایک دوسرے مقام پر فرماتے ہیں: ’’ليس حديثه بشيء‘‘[51].اس کی حدیث لیس بشیء ہے۔

امام علی بن مدینی l فرماتے ہیں: ’’ كانت له أحاديث منكرة‘‘[52]. اس کی احادیث منکر ہیں۔

علامہ عبد اللہ بن علی بن مدینی l فرماتے ہیں: ’’وسألته يعني: أباه عن سلام بن سليمان التميمي، فضعفه جدا‘‘[53]. اور میں نے اپنے والد سے سلام بن سلیمان تمیمی کے بارے میں پوچھا تو انہوں نے اسے شدید ضعیف قرار دیا۔

امام احمد بن حنبل l نے سلام طویل کو ’’منكر الحديث‘‘ کہا ہے[54]۔

حافظ محمد بن عبد اللہ بن عمار موصلی l نے سلام طویل کو ’’ليس بحجة‘‘ کہا ہے[55]۔

حافظ مفضل بن غسان غلابی l نے سلام طویل کو ایک مقام پر ’’ضعيف‘‘ اور دوسرے مقام پر ’’مذموم‘‘ کہا ہے[56]۔

امام بخاری l ’’التاريخ الكبير‘‘[57] اور ’’الضعفاء‘‘[58] میں فرماتے ہیں: ’’تركوه‘‘. اسے ترک کردیا گیا ہے۔

امام بخاری l ’’التاريخ الصغير‘‘[59] میں فرماتے ہیں: ’’يتكلمون فيه‘‘. محدثین اس کے بارے میں کلام کرتے ہیں۔

حافظ جوزجانی l نے ’’ أحوال الرجال‘‘[60] میں سلام کو ’’غير ثقة‘‘ کہا ہے۔

حافظ ابو زرعہ l نے سلام بن سلم کو ’’ضعيف الحديث‘‘ کہا ہے[61]۔

حافظ برذعی l فرماتے ہیں: ’’وذكرت لأبي زرعة في حديث جرى عنده سلام الطويل، فحرك رأسه كالمتعجب من ذكري له، كأن سلاما عنده في موضع لا يذكر، ومر بحديث في كتابنا عنه عن قبيصة، عن سلام، فأمر أن نضرب عليه، وقال: سلام ما نصنع به‘‘[62]. میں نے ابو زرعہ l کے پاس جاری ایک حدیث میں سلام طویل کا تذکرہ کردیا، تو ابو زرعہ l نے اپنے سر کو ایسے حرکت دی گویا کہ ان کو میرے سلام کو ذکر کرنے سے تعجب ہو رہا تھا، گویا کہ ابو زرعہ l کے نزدیک سلام ایسے مقام پر ہے کہ اس کا ذکر نہ کیا جائے، اور ہماری کتاب میں ایک حدیث گزری جو قبیصہ، عن سلام کے طریق سے تھی، تو ابو زرعہ l نے حکم دیا کہ ہم اسے ترک کر دیں، اور فرمایا: سلام کا ہم کیا کریں؟

حافظ ابو حاتمl فرماتے ہیں: ’’ضعيف الحديث، تركوه‘‘[63]. ضعیف الحدیث ہے، محدثین نے اس کی حدیث کو ترک کر دیا ہے۔

حافظ ابو حاتمl نے ایک حدیث کے تحت سلام طویل کو ’’متروك الحديث‘‘ کہا ہے[64]۔

امام نسائی l نے ’’الضعفاء‘‘[65] میں سلام طویل کو ’’متروك الحديث‘‘ کہا ہے۔

امام نسائی l ایک دوسرے مقام پر فرماتے ہیں: ’’ليس بثقة، ولا يكتب حديثه‘‘[66]. ثقہ نہیں ہے، اور اس کی حدیث نہیں لکھی جائے گی۔

حافظ مغلطای l ’’إكمال‘‘[67] میں فرماتے ہیں: ’’وفي كتاب ابن الجارود: ثنا إسحاق بن إبراهيم، ثنا إسحاق بن عيسى، عن سلام الطويل، وكان ثقة‘‘. اور ابن جارود l کی کتاب میں ہے، ہمیں اسحاق بن ابراہیم نے بیان کیا، وہ فرماتے ہیں: ہمیں اسحاق بن عیسی نے سلام طویل کے حوالہ سے بیان کیا، اور وہ ثقہ تھا۔

اہم فائدہ: سند کے راوی اسحاق بن عیسی کا ترجمہ نہیں مل سکا، واللہ اعلم۔

حافظ زکریا بن یحیی ساجی l فرماتے ہیں: ’’عنده مناكير‘‘[68]. اس کے پاس مناکیر ہیں۔

حافظ عقیلیl ’’الضعفاء الكبير‘‘[69] میں سلام طویل کے ترجمہ میں چند احادیث تخریج کرکے فرماتے ہیں:’’لا يتابع على هذه الأحاديث، والغالب على حديثه الوهم‘‘. ان احادیث میں متابعت نہیں ہے، اور سلام کی حدیث میں وہم غالب ہے۔

حافظ ابن حبان l ’’المجروحين‘‘ [70] میں فرماتے ہیں: ’’يروي عن الثقات الموضوعات، كأنه كان المعتمد لها‘‘. ثقہ راویوں کے انتساب سے من گھڑت روایات نقل کرتا ہے، گویا کہ یہ جان بوجھ کر ایسا کرتا ہے۔

علامہ سبط ابن عجمی l نے ’’الكشف‘‘[71] میں اور علامہ ابن عراق l نے ’’تنزيه الشريعة‘‘[72] میں سلام طویل کو متہم بالوضع راویوں کی فہرست میں شمار کرکے حافظ ابن حبان l کے قول پر اعتماد کیا ہے۔

حافظ ابن عدی l ’’الكامل‘‘[73] میں سلام طویل کے ترجمہ میں چند روایات ذکر کرکے فرماتے ہیں:’’ولسلام أحاديث صالحة غير ما ذكرته، وعامة ما يرويه عمن يرويه عن الضعفاء والثقات لا يتابعه أحد عليه‘‘. اور سلام کی میری ذکر کردہ احادیث کے علاوہ بھی صالح احادیث ہیں، اور اس کی اکثر روایات جنہیں یہ ضعفاء اور ثقات سے روایت کرتا ہےان میں اس کی متابعت نہیں کی جاتی۔

امام دارقطنی l نے اپنی ’’سنن‘‘[74] میں ایک روایت کے تحت سلام طویل کو ’’ضعيف الحديث‘‘ کہا ہے۔

حافظ ابو عبد اللہ حاکم نیشاپوری l ’’المستدرك‘‘[75] میں سلام بن سُلیم طویل کے طریق سے ایک روایت تخریج کرکے فرماتے ہیں: ’’عبد الملك بن عبد الرحمن الذي في هذا الإسناد مجهول، لا نعرفه بعدالة، ولا جرح، والباقون كلهم ثقات‘‘. اس اسناد میں موجود عبد الملک بن عبد الرحمن مجہول ہے، ہم اس کی عدالت کی معرفت نہیں رکھتے، اور نہ ہی جرح کی، اور باقی تمام ثقہ ہیں۔

امام بیہقی l نے ’’السنن الكبرى‘‘[76]میں سلام طویل کو ’’متروك‘‘ کہا ہے۔

حافظ ابن قیسرانیl ’’معرفة التذكرة‘‘[77] میں ایک روایت کے تحت سلام طویل کے بارے میں فرماتے ہیں: ’’لا شيء، يضع الحديث‘‘. لاشیء ہے، حدیث گھڑتا ہے۔

علامہ عبد الحق اشبیلی l نے ’’الأحكام الوسطى‘‘[78] میں سلام طویل کو  ’’متروك‘‘ کہا ہے۔

حافظ ذہبی l نے سلام طویل کو ’’میزان‘‘[79] اور ’’ديوان‘‘[80] میں ’’تركوه‘‘ اور ’’المغني‘‘[81] میں ’’متروك‘‘ کہا ہے۔

حافظ مغلطای l نے ’’شرح سنن ابن ماجه‘‘[82] میں ایک روایت کے تحت سلام طویل کو ’’متروك‘‘ کہا ہے۔

حافظ ابن کثیرl نے اپنی ’’تفسير‘‘[83] میں سلام طویل کو ’’متروك‘‘ کہا ہے۔

حافظ عراقیl نے ’’محجة القرب‘‘[84] میں ایک روایت کے تحت سلام طویل کو ’’متروك‘‘ کہا ہے۔

حافظ ابن حجر عسقلانیl نے ’’اتحاف المهرة‘‘[85] میں سلام طویل کو ’’ضعيف الحديث‘‘کہا ہے۔

حافظ سخاویl نے ’’المقاصد الحسنة‘‘[86]میں ایک روایت کے تحت سلام طویل کو ’’متروك‘‘ کہا ہے۔