فضائل اعمال میں ضعیف حدیث قبول ہونے کا یہ مطلب ہے کہ اس میں ثواب سمجھے بغیر عمل کرلے،بشرطیکہ ضعفِ شدید نہ ہو اور وہ عمل کسی اصل شرعی کے تحت داخل ہو۔

سوال: حضور ﷺ کے نام مبارک پر دونوں ہاتھوں کے انگوٹھے کے ساتھ منہ سے بوسہ لے کر دونوں آنکھوں پر لگاتے ہیں یہ جائز ہے یا نہیں؟ اگر ناجائز ہے تو کیسا گناہ ہے، اور کس کتاب میں ہے ؟

جواب:  آنحضرت ﷺ کا نام مبارک سن کر انگوٹھے چومنا بدعت ہے، کیونکر  [کذا في الأصل] اکثر لوگ اس کو ثواب سمجھتے ہیں، اور وہ موقوف ہے روایت پر، اور روایت اس بارے میں کوئی ثابت نہیں، {كما قال السخاوي في المقاصد الحسنة:  ولايصح في المرفوع من كل هذا شیء}. [جیسا کہ امام سخاوی l نے  ’’ المقاصد الحسنہ ‘‘ میں کہا ہے کہ اس باب میں کوئی بھی مرفوع حدیث صحیح نہیں ہے] اور فضائل اعمال میں ضعیف حدیث قبول ہونے کا یہ مطلب ہے کہ اس میں ثواب سمجھے بغیر عمل کرلے،بشرطیکہ ضعفِ شدید نہ ہو اور وہ عمل کسی اصل شرعی کے تحت میں داخل ہو، {کما صرح به في الدرالمختار}. (شامی ص: ۱۳۲،ج: ۱)

{شرط العمل بالحديث الضعيف عدم شدة ضعفه، وأن يدخل تحت أصل عام، وأن لايعتقد سنية ذلك الحديث، وقال الشامي: أي: سنية العمل به}. [حدیث ضعیف پر عمل کی شرائط میں  ہے کہ حدیث کا ضعف شدید نہ ہو،اور وہ اصل عام کے تحت داخل ہو، اور اس حدیث کے سنت ہونے کا اعتقاد نہ کرے، شامی l فرماتے ہیں : یعنی اس پر عمل کےمسنون  ہونے کا اعتقاد نہ رکھے]اور آج کل لوگ ثواب سمجھنے کے علاوہ تارک پر ملامت کرتے ہیں، اس لئے اس فعل سے روکا جاوے گا، واللہ اعلم بالصواب! {ومايترائى [کذا في الأصل] في بعض كتب الفقهة [کذا في الأصل] من التحريض على فعله فمبني على ظنهم أن ضعفه يسير، وما ذكر عن بعض المشائخ [کذا في الأصل] فعلى طريق الرُقية من رمد العين}[1]. [اور بعض فقہ کی کتابوں میں جو یہ دیکھا جاتا ہے کہ اس عمل پر ابھارتے ہیں، اس کی وجہ یہ ہے کہ ان فقہاء نے اس حدیث کوہلکے درجہ کا ضعیف گمان کیا ہوگا، نیز یہ عمل جوبعض مشائخ سے منقول ہے وہ آنکھوں کے درد میں دم کے طور پر ہے]۔