نماز کے مختلف ارکان و اعمال پر اجر

شیخ ابوبکربن محمدعلی قرشیl رحمہ اللہ  نے ’’أنیس الواعظین‘‘[1]میں مذکورہ روایت کو ’’مصابیح ‘‘[2]کے حوالےسے بلاسند ان الفاظ سےنقل کیا ہے:

’’مصابیح میں حدیث مذکور ہے کہ تکبیر کہتے وقت بندہ اس طرح گناہوں سے پاک وصاف ہوتا ہے جیسے ابھی ماں کے پیٹ سے پیدا ہواہے،اور جب ’’سبحانک...‘‘ پڑھتا ہے تو اس کے ہر روئیں کے عوض میں اللہ تعالیٰ ایسی ایک سال کی عبادت کا ثواب اس کو دیتا ہے، جس میں دن کوروزہ رکھا ہواور شب کوعبادت کی ہو، اور جب’’أعوذ بالله من الشیطان الرجیم بسم الله الرحمن الرحیم‘‘ کہتا ہے تو اللہ تعالیٰ اس کے نامۂ اعمال میں چارہزار نیکیاں لکھواتا ہے اور چار ہزار برائیاں دور کرتا ہے اور جنت میں اس کے لئے چار ہزار درجے بلند کرتا ہے، اور جب بندہ سورۂ فاتحہ پڑھتا ہے تو اس کے نامۂ اعمال میں حج اور عمرے کا ثواب درج کرتا ہے،اور جب بندہ رکوع میں جاتا ہے تو گویا خدا کی راہ میں اپنےوزن کےبرابر سونا دیتا ہے، اور جب رکوع میں ’’سبحان ربی العظیم‘‘ تین مرتبہ پڑھتا ہے توگویا تمام کتب ِمنزلہ کی تلاوت کرتا ہے، اور جب رکوع سے سر اٹھاکر ’’سمع الله لمن حمده‘‘ کہتا ہے تواللہ تعالیٰ اس کی طرف رحمت کی نظر سے دیکھتا ہے، اور جب سجدہ میں جاتا ہے تو گویا ہرآیتِ قرآنی پرایک بَرْدَہ (غلام) آزاد کرتا ہے، اور جب’’سبحان ربی الأعلى‘‘ کہتا ہے تو دیواور پریوں کے شمار کے برابر نیکیاں اللہ تعالیٰ اس کے نامۂ اعمال میں لکھواتا ہے،اسی قدر برائیاں اس کی دور کرتا ہے، اور جنت میں اسی قدر درجے اس کے لئے بلند کرتا ہے، اور جب جلسہ(قعدہ) کرتا ہے اور تشہد پڑھتا ہے تو صبر کرنے والوں کا ثواب اللہ تعالی اسے عطاء فرماتاہے،اور جب سلام پھیرتا ہے تو بہشت کے آٹھوں دروازے اس کے لئے کھول دیے جاتے ہیں اور اس کواختیار دیا جاتا ہے کہ جس دروازے سے چاہے جنت میں داخل ہو‘‘۔