روایت: ’’خُذُ وا شَطْرَ دِینِکم عن الحُمَیرَاء‘‘. تم اپنا نصف دین حمیراء (حضرت عائشہ R) سے حاصل کرو۔

اعزاز وامتیاز ہر قوم کا قابلِ قدر سرمایہ ہوتا ہے،البتہ بعض خوبیاں قومی شناخت بن جاتی ہیں، جس پر قوم کا ہر فرد فخر محسوس کرتاہے، امّت محمدیہ ـ زادها اﷲ شرفاً بنَبِیِّها ـ ایسی ہی گراں قد ر شرافتوں سے آراستہ ہے،جس نے اقوام عالم میں اسے شاہانہ مقام بخشا ہے، انہیں مناقب میں ایک خصوصیت یہ ہے کہ ملت کا ہر فرد ایک مستحکم واسطے،یعنی ’’اسناد‘‘ کے ذریعے اپنے نبی ﷺ کی تعلیمات سے جڑا ہوا ہے،ملا علی قاری l اس نعمت عظمی کی اہمیت ان لفظوں میں بیان کرتے ہیں:

’’أصل الإسناد خَصِیصَةٌ فاضلةٌ مِنْ خَصَائص هذه الأمّة،وسنةٌ بالغةٌ مِنْ السُّنَن المؤکَّدة، بل مِنْ فُرُوضِ الکِفَایَة‘‘[1]. اس امت کی ایک بڑی شرافت والی خصوصیت، اس کا اسنادی اسا س سے مُتَّصف ہونا ہے،جو مؤکدہ سنتوں میں ایک بڑی سنت ہے،بلکہ اس کا جاننا فرضِ کفایہ ہے۔

یہ بھی ملحوظ رہے کہ شریعتِ اسلامی کا تحریف وتصحیف سے محفوظ رہنا، اسی ’’اسناد‘‘ کے مبارک نتائج ہیں،امام ابو عبد اﷲ حاکم نَیسَابُورِی l فرماتے ہیں:

’’فلولا الإسناد وطَلَبُ هذه الطائفِة له،وکثرةُ مُوَاظَبَتِهم علی حِفْظِه، لَدَرَسَ مَنَارُ الإسلامِ، وتَمَکّن أهل الإلْحَادِ والبِدع منه، بِوَضْع الأحادیث، وقَلْبِ الأسانید؛ فإنّ الأخبار إذا تَعَرّتْ عن وجود الإسناد فیها کانت بُتْراً‘‘[2].

’’اگر اسناد نہ ہوتی اوریہ جماعت اسناد کی تلاش اور اسکی حفاظت میں خاص اشتغال نہ رکھتی،تو اسلام کے نشانات تک مٹ جاتے، ملحدین اوراہل بدعت من گھڑت حدیثوں اورانکی سندوں میں ہیر پھیر کرکے اسلام پر قابض ہوجاتے؛ کیونکہ حدیثیں سندوں سے خالی ہو کر، ناقص رہ جاتی ہیں‘‘۔

ذیل میں اسی فریضے کے پیشِ نظر ایک ایسی روایت پیش کی جائی گی، جو محدثین رحمہم اللہ تعالی کے نزدیک کسی سند سے ثابت نہیں ہے؛ اس لئے اس کا بیان کرنا بھی درست نہیں ہے (تفصیل آگے آئے گی)، اس کے باوجود یہ روایت زبان زَد عام ہے۔