روایت: آپ ﷺ کا ارشاد ہے: ’’المَعْرِفَةُ رَأسُ مَالِي...‘‘. اﷲ کی معرفت میرا سرمایہ ہے۔۔۔‘‘۔

علوم شرعیہ میں تصنیف وتالیف کو بنیادی حیثیت حاصل ہے،لیکن اسلامی تعلیمات کی تذکیر وتشہیر دیگر فنون وعلوم سے یکسر مختلف ہے؛ کیونکہ شریعت کے تمام مضامین، اپنی خاص بنیادی اساس پر قائم ہوتے ہیں، جن کی روشنی میں ہر تصنیف وتالیف کی صحت و سُقَم کا فیصلہ ہوتا ہے، خصوصاً احادیث کو نقل کر نے کے سلسلے میں محدثینِ کرام کی وضع کردہ شرائط پر پورا اترنا انتہائی اہم ہے،ورنہ صاحبِ تصنیف بعض اوقات غیر مستند روایات کی تشہیر کرنے لگتا ہے، ہمارے پاک وہند کی تصنیفات میں اس اہم فریضے کی طرف مزید توجہ کی ضرورت ہے، چنانچہ ہم یہاں خاتم المحدثین مولانا عبد العزیز فرہاروی l کا ایک اقتباس نقل کرتے ہیں،جس سے اندازہ ہوتا ہے کہ ہمارے عرف میں غیر مستند روایات کے پھیلنے کی کیا وجوہات ہیں، تاکہ ان اسباب سے اہتمام سے بچا جاسکے، ملاحظہ ہو:

’’والسَّبَبُ أنّه قَلَّ اشْتِغَالُهم بِصَنَاعَةِ الحَدِیث، وأنّهم اعْتَمَدُوا علی المشهور في الألْسِنَة مِنْ تَحْسِیْنِ الظَّنّ بالمُسْلِم، وأنَّهم انْخَدَعُوا بالکُتُب الغَیرِ المُنَقَّحَةِ الحَاوِیَةِ لِلرطْبِ والیَابِسِ، وأنَّة لم یَبْلُغْهُم وَعِیدُ التَّهَاوُنِ في روایةِ الحَدِیثِ، وأیضاً منهم مَنْ یَعْتَمِدُ علی کُلِّ ما أسْنِدَ مِنْ غَیرِ قَدْحٍ وتَعْدِیلٍ في الرُّوَاة‘‘[1].

’’(ان کتب میں رطب ویابس احادیث کی )وجہ یہ ہے کہ ان کتابوں کے مصنّفین فن حدیث سے مشغولیت کم رکھتے تھے،اور مسلمان سے حسن ظن رکھتے ہوئے، زبان زَد عام روایتوں پر بھروسہ کر لیتے [حا لانکہ ایسا اعتماد صرف ماہرِ فن پر ہی کیا جا سکتا ہے،نہ کہ حدیث میں کم اشتغال رکھنے والوں پر] اور یہ مصنفین رطب ویابس پر مشتمل، غیر منقح کتابوں سے دھوکے میں پڑگئے، اور (ان کے بارے میں یہی حسنِ ظن ہےکہ)ان مصنفین کو حدیث نقل کرنے میں تہاون (حقیر سمجھنا) کی وعید نہیں پہنچی ہوگی،اور ان میں بعض مصنفین ایسے بھی ہیں کہ سند کے راویوں کی جرح وقدح دیکھے بغیر، ہر سند والی روایت پر اعتمادکر لیتے ہیں‘‘۔

بہرحال ہمارے معاشرے میں اَربابِ تصنیف کے ساتھ ساتھ، ہر فردِ امت کو حدیث کے معاملے میں انتہائی حسّاس رہنے کی ضرورت ہے،تا کہ من گھڑت اور ساقط الاعتبار احادیث کی روک تھام ہوسکے۔

اسی اہمیت کے پیش ِنظرذیل میں ایک ایسی حدیث پیش کی جائے گی،جو محدثینِ کرام کے نزدیک بے اصل اور من گھڑت ہے؛ اس لئے اس کے بیان کرنے سے احتراز ضروری ہے۔