حمید الطویل

محمد بن زُرَیْق کے شیخ حمید الطویل کو حافظ ذہبی l نے  ’’میزان الاعتدال‘‘[8] میں اور ان کی اتباع میں حافظ ابن حجر عسقلانی l نے  ’’لسان المیزان‘‘[9] میں مجہول قرار دیا ہے۔

نیز حافظ ذہبی l  ’’المغني‘‘[10] میں فرماتے ہیں:  ’’شيخ، لا يدرى من هو، روى عنه محمد بن زُرَيْق المَوْصِلِي‘‘. یہ شیخ ہے، اس کے بارے میں معلوم نہیں کہ یہ کون ہے، اس سے محمد بن زُرَیْق مَوْصِلِی نے روایت کی ہے۔

حافظ خطیب بغدادی l نے ’’تلخيص المتشابه‘‘[11] میں اور حافظ ابن ماکولاl نے  ’’الإكمال‘‘[12] میں حمید الطویل کو مجہول قرار دیا ہے، ’’تلخيص المتشابه‘‘ کی عبارت ملاحظہ ہو:

 ’’ محمد بن زُرَيْق أبو الزاهد الموصلي، حدث عن حميد الطويل المعروف بالمُجَذَّع وليس بحميد بن تِيْرَوَيْه البصري، هذا آخر في عداد المجهولين، روى عن أبي الزاهد ابن أخيه يوسف بن المبارك القَلَّاس‘‘ .

 محمد بن زُرَیْق ابو زاہد مَوْصِلِی نے حمید الطویل جو اَلْمُجَذَّع سے مشہور ہے، سے روایت کی ہے، یہ (مروی عنہ) حمید بن تِیْرَوَیْہ بصری نہیں ہے، یہ حمید الطویل مجہول راویوں میں شمار ہوتے ہیں، یہ ابو زاہد اپنے بھائی کے بیٹے یوسف بن مبارک قلاس سے احادیث نقل کرتا ہے۔