شرائطِ ثلاثہ کا تاریخی وعملی پس منظر
تحقیق کی تفصیل
جمہور علماء کے نزدیک، فضائل کے باب میں ضعیف حدیث پرعمل کرنا جائز ہے، البتہ اس جوازِ عمل کے لئے تین بنیادی شرائط ہیں،جن کو حافظ سخاوی رحمہ اللہ نے ’’القَولُ البَدِیع‘‘[1] میں ذکر کیا ہے، موصوف فرماتے ہیں:
’’میں نے اپنے شیخ حافظ ابن حجر رحمہ اللہ سے کئی دفعہ سنا ہے - حافظ ابن حجر رحمہ اللہ نے مجھے اپنی تحریر سے یہ شرائط لکھ کر بھی دیں - ضعیف حدیث پر عمل کرنے کے لئے تین شرائط ہیں: پہلی شرط اتفاقی ہے کہ ضُعف شدید نہ ہو، لہذا اس شرط سے وہ کذّابین، متہّمین اور فاحش الغلط راویانِ حدیث نکل گئے ،جو نقلِ روایت میں تنہا ہوں۔
دوسری شرط یہ ہے کہ وہ روایت،دین کے اصلِ عام کے تحت داخل ہو، اس شرط سے وہ روایتیں نکل گئیں، جو گھڑی گئی ہوں،اس طور پر کہ اس کی کوئی اصل نہ ہو۔
تیسری شرط یہ ہے کہ حدیث پر عمل کرتے وقت ثبوتِ حدیث کا اعتقاد نہ ہو، تاکہ آپﷺ کی طرف کوئی ایسی بات منسوب نہ ہو جائے جو آپ ﷺ نے نہ فرمائی ہو‘‘۔
حافظ ابن حجر رحمہ اللہ نے مزید فرمایا کہ آخری دو شرطیں ابن عبد السلام رحمہ اللہ اور ابن دقیق العید رحمہ اللہ سے منقول ہیں، اور شرطِ اول پر علامہ علائی رحمہ اللہ نے علماء کا اتفاق نقل کیا ہے۔
ذیل میں ہم شرائطِ ثلاثہ کا فنی جائزہ پیش کریں گے:
شرطِ اول کا جائزہ:
حافظ ابن حجر رحمہ اللہ نے شرطِ اول کے عنوان سے چند راویوں کی جانب اشارہ کیا ہے، ان راویوں کی روایت فضائل میں بھی بیان نہیں کر سکتے، در حقیقت شرطِ اوّل میں ان راویوں کو ذکر کرکے حدیث کی ترتیب وارتین خاص انواع کی جانب اشارہ ہے:
(۱) موضوع
(۲) متروک
(۳) منکر
کذابین سے’’ موضوع‘‘ روایت کی جانب اشارہ ہے۔
متہمین سے ’’متروک ‘‘روایت کی جانب اشارہ ہے۔
اور فاحشُ الغلط سے ’’منکر‘‘ روایت کی جانب اشارہ ہے۔
حافظ سخاوی رحمہ اللہ کی مندرجہ ذیل عبارت سے آپ اس حقیقت سے بخوبی واقف ہو جائیں گے۔
’’متہم بالکذب راوی کا تنہا روایت کرنا اس روایت کو موضوع کہلانے کےلئے کافی نہیں ہے، یہی وجہ ہے کہ ہمارے شیخ حافظ ابن حجر رحمہ اللہ نے متہم کی روایت کو ایک علیحدہ قسم بنایا ہے اور اس کا نام ’’متروک‘‘ رکھا ہے۔
حافظ ابن حجر رحمہ اللہ نے متروک روایت کی تفسیر کرتے ہوئے کہا ہے کہ متروک روایت وہ ہے جسے ایک ایسا شخص نقل کرے ،جو حدیث ِرسول میں جھوٹ بولنے کے ساتھ متہم ہو، اور وہ روایت صرف اسی شخص سے مروی ہو، نیز یہ روایت شرعی قواعد کے خلاف ہو، اسی طرح اس شخص کی روایت بھی متروک کہلا تی ہے، جو اپنی عام گفتگو میں جھوٹ بولنے میں معروف ہو، البتہ اس شخص سے حدیث ِرسول میں جھوٹ بولنا ثابت نہ ہو، یہ دوسری قسم شناعت میں کم ہے‘‘۔
حافظ سخاوی رحمہ اللہ مزید لکھتے ہیں:
’’حافظ ابن حجر رحمہ اللہ کے قول متہم بالکذب سے وہ راوی نکل گئے، جو حدیث نبوی میں جھوٹ بولنے میں معروف ہوں، اور یہ حدیث صرف انہیں سے منقول ہو، ایسی حدیث پر ہم وضع کا حکم لگاتے ہیں، بشرطیکہ قرائن وضع کے مقتضی ہوں، جیسا کہ حافظ علائی رحمہ اللہ وغیرہ نے اس کی وضاحت کی ہے‘‘[2]۔
حافظ ابن حجر رحمہ اللہ کی شرائط ِثلاثہ اور حافظ سخاوی رحمہ اللہ کے توضیحی کلام سے چند باتیں معلوم ہوتیں ہیں:
اگر کوئی راوی حدیث ِرسول میں جھوٹ بولنے میں معروف ہے اور وہ کوئی روایت تنہا نقل کرے ،تو قرائن کی روشی میں اس روایت کو ’’من گھڑت‘‘ کہا جائے گا، اور ظاہر ہے کہ فضائل میں بھی من گھڑت روایت بیان نہیں کی جا سکتی۔
ایک شخص پر حدیث ِرسول میں جھوٹ بولنے کا اتہام ہو،اور وہ شخص دین کے قواعد ِمعلومہ کے خلاف کوئی روایت نقل کرے، اور وہ اس روایت کے نقل کرنے میں تنہا ہو ،اس صورت میں یہ روایت ’’متروک‘‘ کہلاتی ہے، اسے فضائل میں بیان کرنا جائز نہیں ہے۔
اگر ایک شخص اپنی عام گفتگو میں جھوٹ بولنے میں معروف ہو، البتہ اس کے بارے میں حدیثِ رسول ﷺ میں جھوٹ بولنا ثابت نہ ہو، تو ایسے شخص کی روایت بھی ’’متروک‘‘ کہلاتی ہے، جسے فضائل میں بیان کرنا جائز نہیں ہے، البتہ یہ قسم شناعت میں کم ہے۔
یہاں تک کی تصریحات سے آپ جان چکے ہیں کہ حافظ ابن حجر رحمہ اللہ نے شرط اوّل میں مذکور کذابین اور متہمین سے حدیث کی دو انواع یعنی ’’موضوع‘‘ اور ’’متروک‘‘ مراد لی ہے ،چنا نچہ اس قسم کی روایتیں فضائل کے باب میں بیان کرنا جائز نہیں ہے، شرط اول میں مذکور لفظ ’’فاحش الغلط‘‘ سے حدیث کی ایک خاص نوع مراد ہے، اس نوع کو حافظ ابن حجر رحمہ اللہ نے’’ منکر‘‘ کا نام دیا ہے، موصوف لکھتے ہیں:
’’جو شخص فاحش الغلط ہو یا کثرت سے غفلت کا شکار ہو یا اس کا فسق کھلا ہوا ہو، تو ایسے شخص کی حدیث ’’منکر‘‘ کہلاتی ہے‘‘[3]۔
حافظ ابن حجر رحمہ اللہ شرطِ اول میں یہ ذکر کر رہے ہیں کہ فضائل میں تین قسم کی روایات بیان نہیں کر سکتے:
(۱) من گھڑت
(۲) متروک
(۳) منکر
بالفاظِ دیگر ان راویوں کی حدیث فضائل کے باب میں بیان کرنا جائز نہیں ہے:
(۱) جو شخص حدیث رسول ﷺ میں جھوٹ بولنے میں معروف ہو۔
(۲) جو شخص حدیث رسولﷺ میں جھوٹ بولنے میں متہم ہو اور وہ قواعد ِدینیہ کے خلاف، کوئی روایت تنہا نقل کرے۔
(۳) جو شخص اپنی عام گفتگو میں جھوٹ بولنے میں معروف ہو، اگرچہ اس شخص سے حدیث رسولﷺ میں جھوٹ بولنا ثابت نہ ہو۔
(۴) وہ شخص جو نقلِ روایت میں فاحش الغلط ہو، یا کثرت سے غفلت کا شکار ہو، یا کھلے فسق میں مبتلا ہو۔
یہ بھی واضح رہے کہ یہ تینوں قسمیں عام محدثین کے نزدیک بھی اسی ترتیب سے مردود ہیں، چنانچہ موضوع روایت تو بالاتفاق مردود ہے، متروک کے ردّ وقبول میں سلفاً وخلفاً اختلاف کی گنجائش نظر آتی ہے، اور منکر میں پھر یہی گنجائش کافی وسعت اختیار کر لیتی ہے، اس امر کی مزید وضاحت آگے آرہی ہے۔
حافظ ابن حجر رحمہ اللہ نے شرط اوّل کو حافظ علائی رحمہ اللہ کے حوالے سے اتفاقی کہا ہے، ضرورت اس امر کی ہے کہ ہم تاریخی حیثیث سے یہ جائزہ لیں کہ فضائل کے باب میں محدثین سلف نے شرطِ اول کی کس حد تک رعایت کی ہے۔
سلف و خلف وضاعین، متہم بالکذب اور فاحش الغلط راویوں سے احتراز کرتے رہے ہیں ،یہ امر کسی توضیح کا محتاج نہیں ہے،البتہ ذیل میں اس کی چند مثالیں لکھی جاتی ہیں:
’’حافظ احمد ابن سنان رحمہ اللہ حافظ ابن مہدی رحمہ اللہ کے بارے میں کہتے ہیں: ابن مہدی رحمہ اللہ کسی شخص کی روایت ترک نہیں کرتے تھے، سوائے متہم بالکذب شخص اور ایسے شخص کی جس میں غلطی کا غلبہ ہو‘‘۔
’’علامہ ابن مبارک رحمہ اللہ لکھتے ہیں: احادیث لکھی جائیں گی، سوائے چار شخصوں کے:
(۱) روایت میں بہت غلطی کرنے والا شخص، جو غلطی میں مراجعت نہیں کرتا۔
(۲) کذاب۔
(۳) جو شخص بدعتی ہو اور بدعت کی طرف کسی کو دعوت دے۔
(۴) وہ شخص جو حدیث حفظِ نہ کرے، اور پھر حفظ سے حدیث بیان کرنا شروع کردے‘‘[4]۔
امام العِلَل حافظ ابن رجب حنبلی رحمہ اللہ نے ’’شرحِ علل الترمذی‘‘ میں اس کےلئے باقاعدہ یہ عنوان قائم کیا ہے: ’’الغَلَطُ الذي یُرَدُّ به الراوي أو یُتْرَکُ‘‘. (یعنی وہ غلطی جس سے راوی مردود یا متروک بن جاتا ہے) اس موضوع کے تحت ان حضرات کے اقوال ہیں:
حضرت سفیان ثوری رحمہ اللہ ، امام شعبہ رحمہ اللہ ، امام احمد ابن حنبل رحمہ اللہ ، امام شافعی رحمہ اللہ ، امام دارقطنی رحمہ اللہ [5]۔
اس کے ساتھ ساتھ ہمیں بعض ایسی نصوص بھی ملتی ہیں جن سے یہ معلوم ہوتا ہے کہ سلف بابِ فضائل میں ،شرطِ اول میں شامل بعض راویوں کی احادیث قبول کر لیتے ہیں، چنانچہ حافظ ابن رجب حنبلی رحمہ اللہ لکھتے ہیں:
’’امام ترمذی رحمہ اللہ نے بیان کیا ہے کہ اگر کوئی متہم بالکذب راوی، یا حدیث میں بنا بر غفلت وکثرتِ خطا ضعیف راوی، نقلِ روایت میں متفرد ہو، اور متعلقہ حدیث صرف اسی راوی سے مروی ہو، تو ان راویوں کی حدیث قابلِ احتجاج نہیں رہتی، امام ترمذی رحمہ اللہ کے اس جملے کا مقصد یہ ہے کہ ان راویوں کی روایت شرعی احکام اور عملی امور میں حجت نہیں بن سکتی، البتہ ان میں بعض راویوں کی روایت رقائق اور ترغیب وترہیب میں نقل کی جائے، تو بہت سے ائمہ نے اس کی اجازت بھی دی ہے کہ رقائق وغیرہ میں ضعفاء کی روایتیں نقل کی جاسکتی ہیں، ان ائمہ میں امام ابن مہدی رحمہ اللہ اور امام احمد بن حنبل رحمہ اللہ بھی ہیں‘‘[6]۔
حافظ ابن رجب حنبلی رحمہ اللہ ، امام العلل حافظ ابو حاتم رحمہ اللہ سے بھی اسی قسم کا مضمون نقل کرتے ہیں، موصوف لکھتے ہیں:
’’ابو حاتم رحمہ اللہ کا یہ قول پہلے گزر چکا ہے کہ وہ شخص جو نقل روایت میں کثیر الغفلت ہو، تو ایسے شخص کی روایت احکام کے علاوہ (فضائل، ترغیب وترہیب) میں بیان کرنا جائز ہے، البتہ متہم بالکذب کی روایت صرف بیانِ حال کی صورت میں بیان کی جا سکتی ہے‘‘[7]۔
امام نووی رحمہ اللہ کے کلام سے بھی یہی ثابت ہے،آپ لکھتے ہیں:
’’اشکال کیا جاتا ہے کہ یہ ائمہ باوجودیکہ جانتے ہیں کہ مغفلین، ضعفاء اور متروکین کی احادیث سے احتجاج درست نہیں ہے ،پھر بھی اپنی کتب میں ان کی احادیث کو ذکر کرتے ہیں‘‘۔
امام نووی رحمہ اللہ نے اس اشکال کے چار جوابات دیے ہیں، چوتھے جواب میں آپ لکھتے ہیں:
’’یہ محدثین ان راویوں سے ترغیب وترہیب، فضائل اعمال، قصص، زُہد اور مکارم اخلاق پر مشتمل روایات جن کا حلال حرام اور دیگر احکام سے تعلق نہیں ہے نقل کرتے رہتے ہیں اور حدیث کی اس نوع میں محدثین تسامح سے کام لیتے ہیں، اور اس کے بیان وعمل کو جائز سمجھتے ہیں، بشرطیکہ روایت من گھڑت نہ ہو‘‘[8]۔
علامہ امیر صَنعَانی رحمہ اللہ لکھتے ہیں:
’’من گھڑت احادیث کے علاوہ دیگر احادیث مثلاً: واہی احادیث کے بارے میں ائمہ حدیث نے تساہل ،اور ان احادیث کو ان کے ضعف کے اظہار کے بغیر بیان کرنے کو جائز کہاہے،بشرطیکہ یہ احادیث احکام کے باب سے نہ ہوں‘‘[9]۔
حافظ ابن حجر رحمہ اللہ نے امام احمد بن حنبل رحمہ اللہ کے صَنِیع میں اسی امر کا اظہار کیا ہے، آپ لکھتے ہیں:
’’حدیث انس رضی اللہ عنہ جو عسقلان کی فضیلت کے بارے میں ہے، یہ حدیث فضائل اعمال میں ہے، اور اس میں رِباط فی سبیل اللہ پر ابھارا گیا ہے، اور حدیث کا مفہوم شرعا ًوعقلا ً محال بھی نہیں ہے، اور حدیث کو صرف اس وجہ سے باطل کہنا کہ یہ ا بو عقال کی روایت میں سے ہے، قرینِ قیاس نہیں ہے، او ر امام احمد بن حنبل رحمہ اللہ کا احکام کے علاوہ ،فضائل کی روایات میں تسامح کرنا تو معروف ہے‘‘[10]۔
حالانکہ حافظ ابن حجر رحمہ اللہ نے ’’تقریب التہذیب‘‘ میں مذکورہ حدیث عسقلان کی سند میں موجود راوی ’’أبو عقا ل هلال بن زید‘‘ کو ’’متروک‘‘ کہا ہے[11]۔
ان نصوص سے یہ بات معلوم ہوگئی کہ ائمہ حدیث فضائل کے باب میں بعض ایسے راویوں کی روایت کو قبول فرمالیتے ہیں ،جن کا ذکر حافظ ابن حجر رحمہ اللہ نے شرطِ اول میں کیا ہے، بشرطیکہ وہ روایت احکام کے باب میں نہ ہو، بلکہ فضائل کے باب میں سے ہو۔
شرطِ ثانی میں کہا گیا تھا کہ روایت دین کے اصلِ عام کے تحت ہو، اس شرط سے گھڑی گئی بے اصل روایتیں نکل گئیں،اصل عام کی وضاحت کےلئے حافظ ابن دقیق العید رحمہ اللہ کی یہ تحریر انتہائی اہمیت کی حامل ہے:
’’ہم نے جہاں کہیں حدیثِ ضعیف کے بارے میں یہ کہا ہے کہ حدیثِ ضعیف میں اس بات کا احتمال ہے کہ اس پر اصلِ عام کے تحت ہونے کی وجہ سے عمل کیا جائے، تو اس عمل کی شرط یہ ہے کہ ان عمومات سے اخص کوئی ایسی دلیل اس روایت کے مقابلہ میں نہ ہو، جس میں اس سے منع کیا گیا ہو، مثلاً: رجب کی پہلی شب جمعہ میں مذکورہ نماز (بعض نوافل مراد ہے) کسی صحیح یا حسن حدیث سے ثابت نہیں ہے، سو جو شخص ان عمومات کے تحت داخل ہونے کی وجہ سے جو نماز اور تسبیحات کے بارے میں وارد ہوئی ہے، اس حدیث پر عمل کرنا چاہے گا تو یہ فعل درست نہیں ہے، کیونکہ صحیح روایت میں آتا ہے آپﷺ نے اس بات سے منع کیا ہے کہ جمعہ کی شب کو قیام کےلئے خاص کر دیا جائے، اور یہ حدیثِ صحیح اخص ہے ان عمومات کے مقابلے میں جو مطلق نماز کی فضیلت پر دلالت کرتی ہیں‘‘[12]۔
سابقہ نصوص سے اصلِ عام کی وضاحت ہو گئی، مثلاً: ایک شخص حدیث ضعیف کے بیان کے مطابق کسی وقت ِخاص اور ہیئت ِخاص کے ساتھ نماز ادا کرنا چاہے، تو وہ مشہور احادیث جن میں نماز اور تسبیح کی فضیلت وارد ہوئی ہے، اس خاص نماز کےلئے اصل عام کہلائے گی، اسی مثال سے اصلِ عام کی دیگر مثالیں بسہولت جانی جاسکتی ہیں، البتہ ساتھ ساتھ یہ بھی معلوم ہو گیا کہ یہ اصل عام اس شرط کے ساتھ ہے مشروط ہے کہ کسی مقابل روایت سے معارض نہ ہو۔
شرطِ ثالث میں کہا گیا تھا حدیثِ ضعیف پر عمل کے وقت ثبوت کا اعتقاد نہ ہو، تا کہ آپﷺ کی جانب ایسی بات منسوب نہ ہو جائے جو آپ نے نہ فرمائی ہو۔
یہ وضاحت تو حافظ ابن حجر رحمہ اللہ بھی فرما چکے ہیں کہ شرطِ ثالث (اور اسی طرح شرطِ ثانی) حافظ ابن دقیق العید رحمہ اللہ اور حافظ ابن عبد السلام رحمہ اللہ نے اختیار فرمائی ہے، اس سے معلوم ہوتا ہے کہ ان حضرات کے علاوہ محدثین کی ایک جماعت اس شرط کو ضروری نہیں سمجھتی، چنانچہ امام نووی رحمہ اللہ بھی انہی لوگوں میں ہیں جو اسے شرط قرار نہیں دیتے، کیونکہ آپ’’الاذکار‘‘ میں جا بجا یہ لکھتے ہیں کہ ’’فضائلِ اعمال میں حدیثِ ضعیف پر عمل مستحب ہے‘‘ انتہی، اور کسی عمل کامستحب ہونا اس عمل کے آپﷺ سے ثبوت یا احتمالِ ثبوت اور پسندیدگی کی خبر دیتا ہے، معلوم ہوا کہ امام نووی رحمہ اللہ کے نزدیک شرطِ ثالث قطعاً ضروری نہیں، امام نووی رحمہ اللہ کے علاوہ امام عبد الرحمن ابن مہدی رحمہ اللہ ، امام احمد ابن جنبل رحمہ اللہ ، امام ابن الصلاح رحمہ اللہ ، حافظ عراقی رحمہ اللہ ، شیخ ابن ہمام رحمہ اللہ ان تمام محدثین نے فضائل کے باب میں حدیثِ ضعیف کےلئے صرف یہ شرط لگائی ہے کہ وہ موضوع نہ ہو، شرطِ ثانی و ثالث کا تذکرہ ان علماء کرام نے نہیں کیا، اور بعض دیگر قوی قرائن سے یہی امر مؤ کد ہوتا ہے کہ سلف و خلف عام طور پر شرطِ ثانی و ثالث کو بابِ فضائل میں قبولیت کےلئے قید قرار نہیں دیتے، کیونکہ محدثین کی ایک جم غفیر نے اس بات کی وضاحت کی ہے کہ حدیث ِضعیف بیان کرتے وقت اس کے ضعف کی صراحت کرنا ضروری نہیں ہے ،چند محدثین کے نام یہ ہیں: علامہ طیبی رحمہ اللہ ، شیخ زکریا انصاری رحمہ اللہ ، علامہ ابن وزیر یمانی رحمہ اللہ ، امام نووی رحمہ اللہ ، حافظ عراقی رحمہ اللہ ، حافظ سخاوی رحمہ اللہ ، سید شریف جرجانی رحمہ اللہ ، حافظ سیوطی رحمہ اللہ ۔
ان تمام محدثین کا بیان ِضعف کو ضروری نہ سمجھنا، اس بات کی واضح دلیل ہے کہ حدیث ضعیف میں عدمِ ثبوت کااعتقاد شرط نہیں ہے، کیونکہ جب عامۃ الناس سامعین کو یہ معلوم ہی نہ ہو گا کہ یہ سحدیث ضعیف ہے تو وہ احادیث میں ہرگز یہ امتیاز نہیں کرسکیں گے کہ یہ حدیث ضعیف ہے اور اس کے ثبوت کا اعتقاد نہیں کرنا چاہیے، اور یہ روایت غیر ضعیف اورقابلِ اعتقاد ہے، اور اس عدم اعتقاد کو ان محدثین نے ہرگز مضر نہیں سمجھا، کیونکہ وہ اس امر کی صراحت کر چکے ہیں کہ بیانِ ضعف ضروری ہی نہیں۔
ان تمام دستاویزات سے یہ بات روز روشن کی طرح واضح ہو جاتی ہے کہ بابِ فضائل میں اگرچہ حافظ ابن دقیق العبد رحمہ اللہ اور حافظ ابن عبد السلام رحمہ اللہ نے شرط ِثانی وثالث کو نقل کیا ہے ،لیکن عام طور پر متقدمین ومتاخرین نے اسے شرط قرار نہیں دیا، یہی وجہ ہے کہ حافظ ابن حجر رحمہ اللہ نے شرائطِ ثلاثہ کے آخر میں اس بات کی صراحت کی ہے کہ شرط ِاول اگرچہ بقول علامہ علائی رحمہ اللہ اتفاقی ہے، لیکن شرط ِثانی وثالث کے قائلین میں صرف حافظ ابن دقیق العید رحمہ اللہ اور حافظ ابن عبد السلام رحمہ اللہ کا نام ذکر کیا ہے، واللہ اعلم۔
اس تمام تفصیل کے بعد اس امر کی وضاحت ضروری ہے کہ ہمارا مقصد صرف اس بات کا اظہار ہے کہ ’’شرائط ثلاثہ‘‘ کی تاریخی حیثیث واضح ہوجائے، بالفاظِ دیگر احقر کے سامنے اب تک سلف وخلف کی وہ عبارات جن کا تعلق ان شرائط ثلاثہ کے اثبات وعدم اثبات سے ہے، وہ سب قارئین کرام کے سامنے پیش کر دی جائے،ان میں کسی ایک جانب کی ترجیح ہمارا موضوع نہیں ہے۔
رہی بات ہماری مذکورہ ’’تحقیقات‘‘ کی، سو اس کا معاملہ ’’اقوال سلف بر روایت‘‘ کی جمع وتالیف سے ہے،اور ظاہر ہے یہ امر ’’شرائط ثلاثہ‘‘ سے ہٹ کر روایات کے بارے میں سلف کے ’’تعامل‘‘ اور ’’اجراء‘‘ سے متعلق ہے، ان میں بعض مقامات پر استیناساً شرائط ثلاثہ کا ذکر بھی کیا گیا ہے، اور ’’بناءتحقیق‘‘ سلف سے ’’منقول ارشادات برروایات‘‘ہیں۔
حوالہ جات
[1] القول البديع:خاتمة:496،ت:الشيخ محمد عوامة،دار اليسر ـ المدينة المنورة،الطبعة الثانية1428هـ .
[2] تنزيه الشريعة:1/10،ت:عبد الوهاب عبد اللطيف وعبد الله محمد الصديق،دار الكتب العلمية ـ بيروت، الطبعة الثانية1401هـ .
[3] نزهة النظر في توضيح نخبة الفكر:المنكر،ص:112،ت:عبد الله بن ضيف الله الرحيلي،مطبعة سفير ـ الرياض،الطبعة الأولى1422هـ .
[4] شرح علل الترمذي:الغلط الذي يرده به الراوي أو يترك:1/399 ،ت:همام عبد الرحيم سعيد،مكتبة الرشد ـ الرياض،الطبعة1421هـ .
[5] شرح علل الترمذي:الغلط الذي يرده به الراوي أو يترك:1/399 ،ت:همام عبد الرحيم سعيد،مكتبة الرشد ـ الرياض،الطبعة1421هـ .
[6] شرح علل الترمذي:رواية الضعفاء والرواية عنهم:1/371 ،ت:همام عبد الرحيم سعيد،مكتبة الرشد ـ الرياض،الطبعة1421هـ .
[7] شرح علل الترمذي:الراوية عن الضعفاء من أهل التهمة بالكذب والغفلة وكثرة الغفلة:1/387 ،ت:همام عبد الرحيم سعيد،مكتبة الرشد ـ الرياض،الطبعة1421هـ .
[8] شرح النووي على الصحيح لمسلم:الكشف عن معايب رواة الحديث:1/251،الطبعة المصرية ـ الأزهر،الطبعة الأولى1347هـ .
[9] توضيح الأفكار:2/82 ،ت:صلاح بن محمد بن عويضة،دار الكتب العلمية ـ بيروت،الطبعة الأولى 1417هـ .
[10] القول المسدد الحديث الثامن:1/27،مكتبة ابن تيمية ـ القاهرة،الطبعة الأولى1401هـ .
[11] تقريب التهذيب:ص:475،رقم:7336،ت:شيخ محمد عوامة،دار الرشيد ـ سوريا،الطبعة الرابعة۱۴۱۸هـ .
[12] إحكام الأحكام:باب فضل الجماعة ووجوبها:1/122،ت:شيخ مصطفى،مؤسسة الرسالة ـ بيروت، الطبعة الأولى۱۴۲۶هـ .