حسن بن علی بن عیسی، ابو عبدالغنی ازدی معانی، قَسْطَلِی بلقاوی

حافظ ابن حبانl ’’المجروحين‘‘[16] میں ابو عبدالغنی حسن بن علی کے بارے میں فرماتے ہیں: ’’يروي عن مالك وغيره من الثقات، ويضع عليهم، لا تحل كتابة حديثه ولا الرواية عنه بحال، وهذا شيخ لا يكاد يعرفه إلا أصحاب الحديث لخفائه، ولكني ذكرته لئلا يغتر بروايته من كتب حديثه ولم يسبر أخباره‘‘. مالک اور ان کے علاوہ ثقہ روات سے روایت کرتا ہے،  اور ان پر حدیث گھڑتا ہے، کسی بھی حالت میں اس کی حدیث کو لکھنا حلال نہیں ہے، اور نہ ہی اس سے روایت کرنا حلال ہے، اور قریب تھا کہ اس شیخ کے مخفی ہونے کی وجہ سے اصحابِ حدیث کے علاوہ کسی کو اس کی معرفت ہی نہ ہوتی، لیکن میں نے اس کو ذکر کیا ہے تاکہ اس کی حدیث سے کسی ایسے شخص کو دھوکہ نہ ہو جس نے اس کی حدیث لکھی ہو، اور اس کی اخبار کو جانچا نہ ہو۔

حافظ سمعانی l نے ’’الأنساب‘‘[17] میں اور علامہ سبط ابن عجمی l نے ’’الكشف الحثيث‘‘[18] میں حافظ ابن حبان l کے کلام پر اعتماد کیا ہے۔

حافظ ابن عدی l ’’الكامل‘‘[19] میں ابو عبدالغنی حسن بن علی کے بارے میں فرماتے ہیں: ’’روى عن عبد الرزاق أحاديث لا يتابعه أحد عليه في فضائل علي وغيره‘‘. اس نے فضائل علی r وغیرہ میں عبد الرزاق سے ایسی احادیث روایت کی ہیں، جن میں کسی نے اس کی متابعت نہیں کی ہے۔

نیز حافظ ابن عدی l ، حسن بن علی ازدی کی دو احادیث تخریج کرکے فرماتے ہیں: ’’وأبو عبد الغني هذا لم أر له من الحديث، ولم يحدثنا عنه أحد بأكثر من خمسة أحاديث، وما رواه يحتمل [ كذا في الأصل]، وكم مجهود من يريد أن يكذب في خمسة أحاديث‘‘. اور اس عبدالغنی کی میں نے حدیث نہیں دیکھی ہے، اور اس کے حوالہ سے ہمیں کسی نے پانچ سے زیادہ احادیث بیان نہیں کیں، اور جو اس نے روایت کیا ہے وہ قابل تحمل ہے، اور وہ شخص کتنی مشقت جھیل رہا ہے جو پانچ احادیث میں جھوٹ بولنے کا ارادہ کر رہا ہے۔

امام ابو عبد اللہ حاکم نیشاپوریl ’’المدخل‘‘[20] میں حسن بن علی ازدی کے بارے میں فرماتے ہیں:  ’’يروي عن مالك الإمام أحاديث موضوعة‘‘. امام مالک l کے انتساب سے من گھڑت احادیث بیان کرتاہے۔

حافظ ابو نعیم اصبہانی l ’’المسند المستخرج‘‘[21] میں حسن بن علی ازدی کے بارے میں فرماتے ہیں: ’’حدث عن مالك بأحاديث موضوعة‘‘.  اس نے مالک l کے انتساب سے من گھڑت احادیث بیان کی ہیں۔

حافظ ابن عساکرl ’’تاريخ دمشق‘‘[22] میں حسن بن علی ازدی کے بارے میں فرماتے ہیں: ’’وكان ضعيفا‘‘. اور یہ ضعیف تھا۔

حافظ ذہبی l نے ’’ديوان الضعفاء‘‘[23] میں ابو عبدالغنی حسن بن علی کو ’’کذاب‘‘ کہاہے۔

حافظ ذہبی l ’’ميزان الاعتدال‘‘[24] میں مینا بن ابی مینا کے ترجمہ میں ایک حدیث کے تحت فرماتے ہیں: ’’ولعله من وضع أبي عبد الغني‘‘. ممکن ہے کہ یہ ابو عبد الغنی کی گھڑی ہوئی ہو۔

علامہ ابن عراق l نے ’’تنزيه الشريعة‘‘[25] میں ابو عبد الغنی کو وضاعین ومتہمین کی فہرست میں شمار کرکے ’’کذاب‘‘ کہاہے۔